Aasulv Bryggesaa

Frå Wikipedia – det frie oppslagsverket
Gå til: navigering, søk
Aasulv Bryggesaa

Aasulv Olsson Bryggesaa (25. april 18563. april 1922) var ein gardbrukar, Venstre-politikar og statsråd frå Hægebostad. Han var 1913-15 kyrkje- og undervisningsminister i Gunnar Knudsens andre regjering.

Bryggesaa var fødd på garden Bryggeså i Eiken sokn i Hægebostad, der faren var gardbrukar. Sjølv gjekk han ut av Holt seminar i 1877, og var deretter lærar i heimbygda i seks år. I 1878 overtok han farsgarden.

Bryggesaa var medlem av heradsstyret i Hægebostad frå 1884, ordførar frå 1889. Frå 1890 var formann i skulestyret, frå 1882 styreformann i Hægebostad sparebank, samt åstadskommissær. Han hadde også verv på fylkesnivå og vidare, så som styremedlem for både amtssjukehuset og formann i komiteen som skaffa amtet ein eigen landbruksskule. Medlem av felleskomiteen for vestlandsbanen og samferdslekomiteen for strekninga Kristiansand-Flekkefjord. Han var medlem av riksskattekommisjonen frå 1912 og fossefallskommisjonen av 1913.

1900–06 var Bryggesaa stortingsrepresentant for Lister og Mandals amt og 1906–15 for valkrinsen Lyngdal. Han var 1900-06 medlem av, 1906-07 sekretær og 1908-12 formann i konstitusjonskomiteen. I 1905 var han sekretær i spesialkomiteen, 1906-09 sekretær i Odelstinget og 1906-07 medlem av særkomiteen om fossefalla. Perioden 1910-12 var han visepresident i Stortinget, i 1912 formann i både reguleringskomiteen og den kombinerte konstitusjons- og protokollkomiteen.

Sist i januar 1913 vart Bryggesaa utnemnd til statsråd og sjef for Kyrkje- og undervisningsdepartementet i den andre Knudsen-regjeringa. Han gjekk ut regjeringa av i oktober 1915 og vart etterfylgd av Jørgen Løvland.

Bryggesaa var mellom dei fremste støttespelarane i Venstre for fråhaldsfolket. Han arbeidde jamt og trutt for å fremje landsmålet. Saman med Jørgen Løvland og Nils Trædal fremja han ei meir aktiv line i arbeidet for landsmålet, då dei på landsmøtet i Venstre 1918 gjorde framlegg om å krevje obligatorisk landsmålsprøve ved eksamen frå offentlege skular med morsmålsprøver og ved embetseksamen. Framlegget vart kraftig motarbeidd av partiformannen Gunnar Knudsen og vart vraka. Det heile enda med at landsmøtet vedtok ein programpost som i realiteten gjekk vidare enn den Bryggesaa, Løvland og Trædal hadde fremja.[1] Bryggesaa tala og for røysterett for kvinner og for demokratiserande reformer i kyrkja.

Bryggesaa døydde 1922 på garden sin i Hægebostad.

Kjelder[endre | endre wikiteksten]

  • Lindstøl, Tallak:Stortinget og Statsraadet 1814-1914. Kristiania, 1914
  • Mjeldheim, Leiv:Parti og rørsle. 1978

Notar[endre | endre wikiteksten]

  1. Mjeldheim:226

Bakgrunnsstoff[endre | endre wikiteksten]