Akselerasjon

Frå Wikipedia – det frie oppslagsverket

Akselerasjonen er på eit tilfeldig punkt på ein fart-tid-graf gitt som gradienten til tangenten av dette punktet

I fysikk er akselerasjon eit mål på kor fort fart endrar seg. Akselerasjonen vert definert som fartsendring per tidseining. Han er difor ein vektormengde med dimensjon lengd/tid². Måleininga for akselerasjon uttrykt ved SI-einingar er meter/sekund².

Å akselerere eit objekt er å endre hastigheita over tid. Sett vitskapleg kan akseleresjon ha både positive og negative verdiar i tillegg til forandringar i retning. Teknisk er akselerasjon definert som «hastigheitsendringsraten til eit objekt sett med hensyn på tida» og er gitt ved fylgjande likning:

$\mathbf{a} = {d\mathbf{v}\over dt}$

der

a er akselerasjonsvektoren

v er hastigheitsvektoren i m/s

t er tida i sekund.

Likninga gir a eininga m/(s·s), eller m/s² (lest som «meter per sekund i andre»).

Ein vanleg måte å måla akselerasjon på er å måla farten til ein lekam ved to ulike punkt, og så dela differansen mellom desse måleverdiane på tida lekamen brukar frå det eine til det andre punktet. Då brukar ein likninga:

$\mathbf{\bar{a}} = \frac{\triangle v}{\triangle t} = \frac{v - v_0}{t - t_0}$