Ann Kristin Aarønes

Frå Wikipedia – det frie oppslagsverket
Ann Kristin Aarønes
Statsborgarskap Noreg
Fødd 19. januar 1973 (51 år)
Ålesund kommune
Idrett fotball
Tok del i

Sommar-OL 1996

Ann Kristin Aarønes (fødd 19. januar 1973), med kallenamnet «Anka», er ein norsk tidlegare fotballspelar frå Ålesund. Ho vart både verdsmeister og europameister med Noreg, og vann OL-bronse i 1996. Mellom 1993 og 2000 vann ho seks cupmeisterskap og fem seriemeisterskap med Trondheims-Ørn. Aarønes spela 111 landskampar for Noreg i tida 1990-99, og skåra 60 mål.

Sidan byrjinga av 2000-talet har ho arbeidd i Aalesunds Fotballklubb.

Klubbspel[endre | endre wikiteksten]

Aarønes sitt spela i yngre år for Spjelkavik Idrettslag, ein klubb som i 1991 rykte opp frå 2. divisjon. Året etter debuterte ho i toppdivisjonen, etter å ha spela sin 12. landskamp. Aarønes vart toppskårar for laget med 12 mål, over halvparten av seriemåla til Spjelkavik.

Spjelkavik rykte ned, og Aarønes melde overgang til Trondheims-Ørn. Der var ho i sin fyrste sesong den nest mest-skårande spelaren med 19 mål, sju mål bak lagkamerat Randi Leinan. Sesongen vart krona med at klubben vann cupgullet det året, med Aarønes på laget. Aarønes var med på å vinne serien og cupen fem gongar kvar i dei neste sju åra ho spela for Trondheims-Ørn. Alle desse åra hadde ho ei sentral rolle i laget, og var ofte avgjerande for at klubben er norsk kvinnefotballs mest meritterte. Ho er utnemnd til æresmedlem i klubben.

I 2000 reiste Aarønes til USA og spela ein sesong for proff-klubben New York Power. Ho la deretter opp.

Landslagsspel[endre | endre wikiteksten]

Aarønes debuterte for Noregs landslag den 2. september 1990. Både i debutkampen mot England og den neste, mot Ungarn, var ho innbyttar, men i sin tredje landskamp, mot Danmark, spela ho frå start, og skåra sitt første mål. Ho kom ikkje med i VM-troppen 1991, men var fast på landslaget frå 1992.

Aarønes var i 1993 med til Italia og finalespel i europameisterskapen. Noreg hadde kvalifisert seg til semifinalane, mellom anna med å slå ut Tyskland. Etter 1-0 over Danmark i semifinalen møtte Noreg vertsnasjonen Italia. På stadion i Cesena vart det norsk siger 1-0. Aarønes spela begge kampane, og vann dermed si fyrste meisterskapsmedalje.

I 1995 var Aarønes ein av dei sentrale spelarane for Noreg under verdsmeisterskapen i Sverige. Ho skåra to mål i opningskampen mot Nigeria og tre mot Canada i gruppespelet. Noreg vann alle tre kampane i gruppespelet, og gjekk vidare til kvartfinale. Noreg sigr også i kvartfinalen mot Danmark, og møtte favorittane USA i semifinalen. Aarønes skåra det einaste målet i kampen mot USA. Tyskland var motstandar i finalen, og vart slått 2-0 etter to raske mål på slutten av fyrste omgangen. Aarønes var toppskårar i turneringa med seks mål, og vann dermed Gullskoen.

Året etter kom Aarønes og resten av landslaget til semifinalespel i OL i Atlanta. Der vart det tap mot USA, men Noreg vann til gjengjeld bronsefinalen mot Brasil etter to kjappe mål av Aarønes.

Aarønes var også med på å vinne samtlege fire sigrar Noreg har oppnådd i Algarve Cup. Ho la opp som landslagsspelar i 1999.

Merittar[endre | endre wikiteksten]

  • VM-gull 1995 for Noreg
  • EM-gull 1993 for Noreg
  • OL-bronse 1996 for Noreg
  • Seriemeister 1994, 1995, 1996, 1997 og 2000 med Trondheims-Ørn
  • NM-gull 1993, 1994, 1996, 1997, 1998 og 1999 med Trondheims-Ørn

Kjelder[endre | endre wikiteksten]

  • Sportsboken, aktuelle årgangar