Anniken Huitfeldt
Anniken Scharning Huitfeldt (fødd 29. november 1969 i Bærum) er ein norsk politikar frå Arbeidarpartiet. Ho er no kulturminister i regjeringa Stoltenberg II. Huitfeldt er utdanna cand.philol. med hovudfag i historie, er gift og har tre ungar.
Huitfeldt er dotter av lagdommar Iver Huitfeldt (f. 1943) og lektor Sidsel Scharning (1940–1990). Ho kjem frå Jessheim i Akershus og høyrer til den danske adelsslekta Huitfeldt (vert uttala hvittfelt). Ho er også niese av Høgre-politikaren Fritz Huitfeldt.
Utdanninga si på vidaregåande skule var ho ferdig med i 1988. Ho var leiar i Ullensaker AUF frå 1985 til 1988 og styremedlem i Akershus AUF frå 1986 til 1990. I 1989 byrja ho på universitetsstudia sine ved Universitetet i Oslo. Ho tok då grunnfag i statsvitskap og historie fram til 1992, då ho byrja på grunnfag i geografi ved London School of Economics. I 1993 var ho tilbake ved Universitetet i Oslo og tok hovudfag i historie.
Ho var nestleiar i Arbeidaranes Ungdomsfylking (AUF) frå 1994 til 1996 og leiar frå 1996 til 2000. Frå 2000 til 2005 arbeidde ho som forskar i Forskningsstiftelsen Fafo. Ho var også styremedlem i Redd Barna frå 2001 til 2007. Huitfeldt var vararepresentant til Stortinget i periodane 1993–1997 og 2001–2005, og vart innvald fast frå Akershus i 2005. Ho har sidan 2002 vore sentralstyremedlem i Arbeidarpartiet, og frå 2007 leiar i Arbeidarpartiets kvinnenettverk. Frå ho vart innvald i 2005 til ho vart statråd i 2008, var ho fyrste nestleiar i Stortingets kyrkje-, utdannings- og forskingskomité, i tillegg til medlem av gruppestyret til Arbeidarpartiet på Stortinget.
Huitfeldt vart i statsråd 29. februar 2008 utnemnd til barne- og likestillingsminister etter at Manuela Ramin-Osmundsen trekte seg frå denne ministerposten. Gorm Kjernli vart då fast vara for henne på Stortinget. 20. oktober 2009 vart ho utnemnd til kulturminister i den «nye» regjeringa Stoltenberg II, og i perioden 2009–2013 er det Are Helseth som møter som fast vara på Stortinget.
[endre] Bibliografi
- Child slavery and child trafficking in West Africa, Roma minorities in the Czech and Slovak Republics, Det globale ekteskapsmarkedet (Fafo-notat 2001–2004)
- Likhet eller Likeverd (1996)
- Fagbevegelsen foran et nytt århundre (1997)
- Sosialdemokratiet 2000 (2000)
- Næringslivets samfunnsansvar (2003)
- Women in Iraq – Analytical Report, Bagdad (2005)
[endre] Kjelde
| Norske barneministrar | |
|---|---|
| Matz Sandman (1991) · Grete Berget (1991-96) · Sylvia Brustad (1996-97) · Valgerd Svarstad Haugland (1997-2000) · Karita Bekkemellem Orheim (2000-01) · Laila Dåvøy (2001-05) · Karita Bekkemellem (2005-07) · Manuela Ramin-Osmundsen (2007-08) · Anniken Huitfeldt (2008-09) · Audun Lysbakken (2009-2012) · Inga Marte Thorkildsen (2012- ) |
| Norske kulturministrar | |
|---|---|
| Lars Roar Langslet (1981–86) · Hallvard Bakke (1986–89) · Eleonore Bjartveit (1989–90) · Åse Kleveland (1990–96) · Turid Birkeland (1996–97) · Anne Enger Lahnstein (1997–99) · Åslaug Haga (1999–2000) · Ellen Horn (2000–01) · Valgerd Svarstad Haugland (2001–05) · Trond Giske (2005–09) · Anniken Huitfeldt (2009–) |
| AUF-leiarar etter 1945 | |
|---|---|
| Trygve Bratteli (1945–46) · Rolf Åkervik (1946–49) · Frank Andersen (1949–52) · Ivar Mathisen (1952–55) · Reidar Hirsti (1955–58) · Bjartmar Gjerde (1958–61) · Reiulf Steen (1961–64) · Ola Teigen (1964–69) · Hans Raastad (1969–71) · Bjørn Tore Godal (1971–73) · Rune Gerhardsen (1973–75) · Sissel Rønbeck (1975–77) · Thorbjørn Jagland (1977–81) · Egil Knudsen (1981–85) · Jens Stoltenberg (1985–89) · Turid Birkeland (1989–92) · Trond Giske (1992–96) · Anniken Huitfeldt (1996–2000) · Eva Kristin Hansen (2000–02) · Gry Larsen (2002–06) · Martin Henriksen (2006–10) · Eskil Pedersen (2010–) |
