Det kongelege mausoleet

Frå Wikipedia – det frie oppslagsverket
Gå til: navigering, søk
Det kongelege mausoleet
Foto: Per E. Hadland

Det kongelege mausoleet er eit kongeleg gravkapell på Akershus festning i Oslo. Mausoleet vart bygd for å hyse dronning Mauds sarkofag, og er oppført i kalkstein frå Asker etter teikningar frå 1939 av arkitekt Arnstein Arneberg. Men på grunn av den tyske okkupasjonen under den andre verdskrigen vart ikkje mausoleet reist før i 1948, og dronningas kiste stod i Gamle Aker kyrkje så lengje krigen varte, deretter i Slottskyrkja på festningen, der ho òg hadde stått før krigen.[1]

Mausoleet er eit tilbygg til Slottskyrkja i sørfløya, og ligg inn i den såkalla Jomfruhagen mellom kyrkja og Jomfrutårnet. Rommet der dronningas sarkofag fekk plass, har ein tønnekvelv av kalkstein og veggar kledde med gjellebekksmarmor. Golvet er av slipte fliser av kalkstein med eit krona krossmotiv felt inn. I ei nisje står det eit alter som er dekorert av kunstmålaren Henrik Sørensen, og midt framfor dette alteret står sarkofagen, som er ein dobbeltsarkofag i kvit nordlandsmarmor der òg kong Haakon 7. vart lagt til kvile i 1957.[1] I ein sarkofag av grøn marmor attmed kviler Märtha og kong Olav V. Båe sarkofagane er teikna av Arnstein Arneberg.

Fotnotar[endre | endre wikiteksten]

  1. 1,0 1,1 Byminner nr.3/2012 Trond Norén Isaksen: Nidarosdomen eller Akershus?, side 24 og 25

Kjelde[endre | endre wikiteksten]

Trond Norén Isaksen: Nidarosdomen eller Akershus?. Oslo museum: Byminner nr.3/2012.