Eide i Granvin

Eide

Frå Eide med Granvin bruk i framgrunnen Foto: Thomas Andersen
Plassering
Eide
Granvin i Hordaland
Geografi
Folketal	446 (2011)
Folketettleik	401,8 /km²
Areal	1,11 km²
Koordinatar	60°31′25″N 6°43′12″E
Annan informasjon
Ferdselsårer	7
Postnummer	5736 GRANVIN
Preposisjon	på Eide

Eide er administrasjonssenteret i Granvin herad i Hardanger i Hordaland. Tettstaden ligg på eidet mellom Granvinsvatnet og Granvinsfjorden, ein sidearm til Hardangerfjorden.

På Eide ligg mellom anna Granvin barne- og ungdomsskule, sagbruket Granvin bruk, Jaunsen Gjestgjevarstad og museet Granvin bygdatun. Her finn ein òg ymse butikkar og kommunale tenestetilbod, og ungdomshuset Trudvang og Granvin idrettsplass.

Eide har frå lang tid attende vore eit trafikknutepunkt som trafikken mellom Hardanger og Voss har gått om. På slutten av 1800-talet var Eide ei mykje vitja hamn for turistbåtar, og det var hotell og gjestgjevarstad der. Turistane fór landevegen opp Skjervet og om Voss før dei reiste ned til Gudvangen ved Sognefjorden, der dei steig ombordatt båtar. Frå 1935 til 1988 var jarnbanen Hardangerbanen i drift mellom Voss og Eide. Fylkesveg 7 går gjennom Eide på veg mellom Brimnes og Bergen, og vert kryssa av Riksveg 13, som går mellom Sandnes og Førde i Sunnfjord.

Bakgrunnsstoff

• Gamle fotografi frå Eide på nettstaden Galleri NOR (Nasjonalbiblioteket)
• Gamle fotografi frå Granvin på nettstaden fotogranvin.com