Geir Holte

Geir Holte
Statsborgarskap	Noreg
Fødd	3. oktober 1959 (64 år) Drammen kommune
Idrett	langrenn
Tok del i	Vinter-OL 1984, Ski-VM 1985

Geir Holte (fødd 3. oktober 1959) er ein tidlegare norsk langrennsløpar frå Hokksund i Buskerud. Hans beste renn i verdscupen i langrenn i Kavgolovo i januar 1988 enda med ein fjerdeplass på 30 km. Han fekk sjeldan sjansen til å representere Noreg under dei store internasjonale meisterskapane. Beste resultat var ein 18. plass på tremila under Ski-VM 1985 i Seefeld. I noregsmeisterskap vann han tre sølvmedaljar, 1984, 1986 og 1989, to av dei på femmila og ei på tremila. Holte vann 50-kilometeren i Holmenkollen i 1985, ei tevling som ikkje talde med i verdscupen, såleis mangla mange av dei fremste langrennsløparane på startstreken. Han var då den første i verda som gjekk ei femmil utan festesmurning. Tor Håkon Holte er ein eldre bror.

Plasseringar

Besteplasseringar i internasjonale meisterskap og renn

• 1983: Nr 8 på 50 km i Oslo
• 1984: Nr 6 på 30 km i Falun
• 1985: Nr 5 på 30 km i Falun
• 1985/86: Nr 13 på 30 km både i Bibawik og La Bresse
• 1987: Nr 15 på 50 km i Holmenkollen
• 1988: Nr 4 på 30 km i Kavgolovo

Medaljar og besteplasseringar i noregsmeisterskap

• Ski-NM 1980: Nr 8 på både tremila i Asker og femmila på Vingrom
• Ski-NM 1981: Nr 6 på 30 km på Eidsvoll
• Ski-NM 1982: Nr 5 på 50 km i Trondheim
• Ski-NM 1983: Nr 5 på både 15 km og på 50 km på Lillehammer
• Ski-NM 1984: Sølvmedalje på 50 km i Hof
• Ski-NM 1985: Nr 6 på 30 km i Tromsø
• Ski-NM 1986: Sølvmedalje på 30 km i Vang
• Ski-NM 1988: Nr 5 på 30 km i Vang
• Ski-NM 1989: Sølvmedalje på 50 km på Geilo
• Ski-NM 1990: Nr 6 på 15 km på Gjøvik

Han vart noregsmeister i stafett (3 x 10 km) tre år på rad for Hokksund Idrettslag, 1984 med broren Tor Håkon Holte og Oddvin Bakkene, 1985 med Tor Håkon Holte og Arild Monsen og 1986 med Tor Håkon Holte og Oddvin Bakkene.

Kjelder

• Sportsboken, aktuelle årgangar

Bakgrunnsstoff

Geir Holte i fis-ski.com