Grimdalstunet

Koordinatar: 59°24′31.194″N 7°56′55.608″E / 59.40866500°N 7.94878000°E / 59.40866500; 7.94878000
Frå Wikipedia – det frie oppslagsverket

59°24′31.194″N 7°56′55.608″E / 59.40866500°N 7.94878000°E / 59.40866500; 7.94878000

Bygningar på Grimdalstunet
Foto: Orf3us

Grimdalstunet er eit gamalt gardstun i grenda Skaftså i Tokke kommune som no er gjort om til museum. Det er kjent som ein kunstnarheim ettersom bilethoggaren Anne Grimdalen (1899–1961) vart fødd og voks opp her.

Fjellgarden Grimdalen, som ligg på 630 moh., har ei historie som går attende til 1600-talet, og er eit av dei eldste autentisk bevarte gardstuna i Noreg. Det eldste av dei ti husa på garden er frå seinmellomalderen, det yngste er frå 1850. Anne Grimdalen voks opp her som ein av ti sysken. Då ho døydde i 1961 var allereie ei rekkje av modellane og støypeoriginalane hennar samla i eit tilbygg ved tunet. Etter bortgangen til Anne Grimsdalen tok Tokke kommune over eigarskapen til modellsamlingane hennar. Gardstunet vart gjort om til museum frå og med 1965, og i 1973 vart det opna eit eige museumsbygg for kunsten, i utkanten av gardstunet.

Livet på garden, og livet til Grimsdalen som kunstnar elles, er skildra i livsminna hennar Slik var det, gjeve ut av broren Olav Grimdalen i 2 bind 1973-74. Olav Grimdalen arbeidde også aktivt for å bevare og utvikle Grimdalstunet.

Museet er ein del av Vest-Telemark Museum, og er tilgjengeleg for publikum i sommarsesongen. Museet er både eit allment kulturhistorisk museum knytt til det gamle gardstunet, eit museum over Anne Grimdalens kunst, med i alt ca. 300 objekt, og eit galleri med nye, skiftande utstillingar kvar sommar. Gardsmuseet er framstilt slik husa var i barndommen til Anne Grimdalen. Illustrasjonane til Karl Erik Harr av Draumkvedet er ein del av den faste utstillinga til museet.

Museet ligg langs Fv45, ni km frå Dalen i Tokke.

Kjelder[endre | endre wikiteksten]