Hitra kommune

	Hitra kommune
	kommune
	Kommunevåpen
	Kommunevåpen
Land	Noreg
Fylke	Trøndelag
Adm.senter	Fillan
Areal	755,89 km²
- land	715,69 km²
- vatn	40,20 km²
Folketal	5 323 (1. januar 2024)
Målform	nøytral
Ordførar	Ole Haugen (Ap)
Kommunenr.	5056
	; Hitra kommune; 63°32′50″N 8°51′17″E / 63.547222222222°N 8.8547222222222°E
	Wikimedia Commons: Hitra
	Nettstad: www.hitra.kommune.no

Denne artikkelen handlar om kommunen. For øya, sjå Hitra.

Hitra er ein øykommune ytst i Trondheimsfjorden i Trøndelag fylke. Hitra grensar til Frøya (eigen kommune sidan 1877) i nord. Mot aust ligg øyar som høyrer til kommunane Ørland og Orkland. Mot vest ligg øykommunen Smøla, som høyrer til Nordmøre i Møre og Romsdal fylke. På fastlandet mot sør ligg Heim kommune i Trøndelag og Aure kommune i Møre og Romsdal. Sjølve øya Hitra er den sjuande største i Fastlands-Noreg og den største i Sør-Noreg.

Symbol[endre | endre wikiteksten]

Kommunevåpen[endre | endre wikiteksten]

Kommunevåpenet til Hitra blei vedtatt av kommunestyret i 1986 og 7. august året etter av Kongen i statsråd. Den heraldiske skildringa av våpenet er: I blått et sølv hjortehode. Motivet kom gjennom ei open idetevling. Det er teikna av Einar Skjervold etter en ide av Ketil Gylland.

Kommuneblome[endre | endre wikiteksten]

Flekkmarihand er ein vanleg blome på Hitra, og kommunestyret vedtok at han skulle vera kommuneblome i 1999. I 2021 blei blomen bekrefta som kommuneblome etter at kommunen blei utvida.^[1]

Historie[endre | endre wikiteksten]

Hitra formannskapsdistrikt omfatta ved opprettinga i 1837 også Frøya. Frøya blei utskild som eigen kommune med 3 949 innbyggjarar den 1. januar 1877, medan Hitra hadde 4 482 innbyggjarar.

Fillan med 2 241 innbyggjarar blei skild ut frå Hitra den 1. januar 1886. Sandstad blei seinare skild ut frå Fillan som eigen kommune 1. juli 1914 med 947 innbyggjarar. Kvenvær med 1 157 innbyggjarar blei skild ut frå Hitra kommune 1. januar 1913. Den gjenverande Hitra kommune hadde etter frådelinga 1 439 innbyggjarar.

Kommunesamanslåinga 1. januar 1964 slo saman dei tidlegare kommunane Hitra, Fillan, Sandstad og Kvenvær til den nye kommunen Hitra. Den nye storkommunen fekk eit innbyggjartal på 4 611. Den tidlegare kommunen Hitra hadde ved kommunesamanslåinga 984 innbyggjarar. Tettstaden Fillan blei vald som nytt kommunesenter der det blei bygd kommuneadministrasjon, barne-, ungdoms- og sentralskole og symjehall.

1. januar 2020 blei Sunde-området nord i Snillfjord kommune del av Hitra. Kommunen fekk dermed litt av arealet på fastlandet.^[2]