Jacek Wszoła

Jacek Wszoła
Jacek Wszoła i 2007
Statsborgarskap	Polen
Fødd	30. desember 1956 (67 år) Warszawa
Yrke	friidrettsutøvar
Språk	polsk
Høgd	195 centimeter
Jacek Wszoła på Commons

Jacek Roman Wszoła (fødd 30. desember 1956) er ein polsk, tidlegare friidrettsutøvar frå Warszawa, som konkurrerte i høgdehopp. Han vart olympisk meister i øvinga i 1976 og tok sølv fire år seinare. I tida 1974-88 vann Wszoła elleve polske meisterskap i høgdehopp.

Aktiv

Wszoła høyrde til mellom dei beste høgdehopparane allereie som 17-åring. I 1974 svinga han seg over 2,20 m, og han vart same sesongen nummer fem i europameisterskapen med 2,19 m. Året etter vart han junior-europameister med eit hopp på 2,22 m i Athen.

Under OL 1976 i Montreal var han ein av dei som ikkje let seg sette ut av eit ausande regnver. Saman med arrangørlandet sin Greg Joy klarte han 2,23 m i fyrste forsøk, men vart den einaste som gjekk over 2,25 m og tok ein høgst overraskande gullmedalje. I 1977 vann han høgdetevlinga både i innandørs-EM i San Sebastian og universiaden i Sofia.

Den 25. mai 1980 forbetra Wszoła den to år gamle verdsrekorden til Vladimir Jasjtsjenko med ein centimeter til 2,35 m under ein internasjonal tevling i Eberstadt. To månader seinare tok han sølvmedaljen under sommarleikane 1980 i Moskva, der austtyske Gerd Wessig vann på 2,36 m og sletta Wszoła sin ferske verdsrekord. Wszoła fekk ikkje delta i friidretts-EM 1982, ettersom han nytta sko av eit japansk merke og ikkje skoa til den faste sko-leverandøren til det polske friidrettsforbundet.

Wszoła vart polsk meister i høgdehopp elleve gongar. Fyrst vann han sju år på rad; 1974-1980, og deretter i 1982, 1984, 1985 og 1988.

Medaljar og plasseringar i internasjonale meisterskap

• EM 1974 i Roma: Nr 5 – 2,19 m
• OL 1976 i Montreal: Gullmedalje – 2,25 m, framom Greg Joy (2,23 m)
• EM 1978 i Praha: Nr 6 – 2,21 m
• OL 1980 i Moskva: Sølvmedalje – 2,31 m, bakom Gerd Wessig (2,36 m)
• VM 1983 i Helsingfors: Nr 13 – 2,23 m

Kjelder

• Denne artikkelen bygger på «Jacek Wszoła» frå Wikipedia på tysk, den 12. april 2015.
• Denne artikkelen bygger på «Jacek Wszoła» frå Wikipedia på engelsk, den 12. april 2015.
• Denne artikkelen bygger på «Jacek Wszoła» frå Wikiedia på polsk, den 12. april 2015.