Katmandu

Kathmandu काठमाडौं [kɑːʈʰmɑːɳɖuː]
Andre namn	येँ, येँ देय्‌
Horisonten til Katmandu
Styresmakter
Land	Nepal
Grunnlagd	723
Geografi
Flatevidd	49 450 000 km²
Innbyggjarar  - By (2011)	1 006 656
Koordinatar	27°42′0″N 85°20′0″E
Høgd over havet	1400 m
Tidssone	Nepaltid (UTC+5.45)
Diverse anna
Heimeside: http://www.kathmandu.gov.np
Nettstad: kathmandu.gov.np

Katmandu (nepali काठमाडौं, newari ये, Yen) er hovudstaden i Nepal og ligg i Katmandu-dalen mellom Himalaya i nord og Mahabharat-fjella i sør på 1 325 meter over havet.

Katmandu vart grunnlagt i 723 og var eit sjølvstendig kongedøme fram til 1769, då herskardynastiet Shah erobra byen og slo han saman med dei to andre bykongedøma i Katmandu-dalen. Desse to byane var Patan, rett sør for Bagmati-elva, og Bhaktapur 12 km søraust for Katmandu. Byen var isolert frå omverda i fleire hundreår, og vart ikkje opna for utanlandsk hjelp og immigrasjon før i 1950-åra.

Dette har skapt eit unikt område med ei rekkje bygningar som står på UNESCO si liste over verneverdige kulturminne. Byen har 450 000 innbyggjarar.

Lakhedans i Katmandu.

Durbar-kvartalet er sentrum i gamlebyen, eit område av hovudstaden som er fullt av tempel og heilage stader. Dette er trekkplaster nummer éin for alle turistane som kjem til byen.

Byen ligg på ein svært jordskjelvutsett stad, og byen har nærast vore jamna med jorda fleire gonger. Ein reknar med at det vil kome eit nytt skjelv om kort tid som vil få katastrofale følgjer. Bygningsmassen er låg, men han er ikkje bygt for å stå imot jordskjelv. Folk bur tett og vasskvaliteten er allereie elendig.

Bakgrunnsstoff

Reiseguide for Kathmandu frå Wikivoyage