Rauma

Frå Wikipedia – det frie oppslagsverket
Gå til: navigering, søk
For kommunen i Møre og Romsdal, sjå Rauma kommune. For andre tydingar av oppslagsordet, sjå Rauma (fleirtyding).
Rauma
Rauma i Romsdal
Rauma i Romsdal
Utspring Lesjaskogsvatnet
- Høgd 611 m
Munning Åndalsnes
- Høgd 0 m
Lengd 68 km
Middelvassføring 44,387 m³/s
Nedslagsfelt 1206,17 km²

Rauma er ei elv i Oppland og Møre og Romsdal fylke. Elva er 68 km lang og renn frå Lesjaskogsvatnet til Åndalsnes ned gjennom Romsdalen og ut ved Veblungsnes.

Raumavassdraget vart verna i Verneplan IV for vassdrag i 1993.

I tillegg til Lesjaskogsvatnet får Rauma vatn frå sideelvene Grøna, Ulvåa, Vermåa og Istra i tillegg til eit utal små bekker som ein ser når ein køyrer nedover Romsdalen. Nedslagsfeltet for Rauma med Istra er på 1206,17 km² med ei midlare avrenning på 36,80 l/s/km² og midlare vassføring på 44,387 m³/s ved utløpet. Etter utbygginga av Mardøla blir dette vatnet ført over til Rauma gjennom Grytten kraftstasjon.

Fossar[endre | endre wikiteksten]

Rauma fell over 600 m frå Lesjaskogsvatnet til Romsdalsfjorden. På denne strekninga er det mange fossar og stryk. Dei meste kjente er Brufossen, Slettafossen, Kyllingfossen, Kjerkjefossen, Eidafossen og Fivafossan. Slettafossen ovanfor Verma er ein turistattraksjon.

Ein del av sidebekkane har spektakulære fossefall når det er god vassføring. Mellom desse er Vermafossen, Døntefossen, Gravdefossen, Brudesløret og Mongefossen. Dei to siste er regulert, men har vassføring ein del av sommaren. Vermafossen har eigen kraftstasjon.

Laksefiske[endre | endre wikiteksten]

Elva er ei av Noregs best kjente lakseelver. Laksen går opp til Kyllingfossen, om lag 42 km frå sjøen. Rauma vart i 1980 infisert av lakseparasitten Gyrodactylus salaris. På grunn av infiseringa vart elva ei av dei første i Noreg rotenonhandsama og fram til 2001 var det berre lov å fange stamfisk til settefiskanlegget på Herje. Frå sesongen 2001 vart det opna for fiske. Ved elva ligg det fleire kjente laksegardar, mellom dei Fiva og Horgheim.

I tidlegare tider fanga ein laks ved hjelp av teiner i elva.

Deltaet[endre | endre wikiteksten]

Deltaet ved Veblungnes er eit av dei største på Vestlandet, men er i dag heilt bygd ned og gjort om til industriområde. Berre ein liten del av vestsida er urørt.

Rauma

Bruer[endre | endre wikiteksten]

Over Rauma er det fleire kjente og verna bruer.

Raumabanen kryssar Rauma fleire gonger. På Opplandsida finn ein Bøvermo bru like etter Bjorli. Vidare kjem steinbruene Stuguflåtbrua og den kjente Kylling bruVerma. Dei siste jernbanebruene over Rauma er Foss bru, Sælsbrua og Skjerve bru.

Gamle vegbruer er Sogge bru og Grøttør bru. Ved utløpet kryssar E136 over Raumabrua.

Bakgrunnsstoff[endre | endre wikiteksten]

Commons-logo.svg Commons har multimedia som gjeld: Rauma