Ricola

Ricola AG
Skipa	1930
Type	Aksjeselskap
Land	Sveits
Hovudkontor	Laufen
Tilsette	400 (2004)
Nettstad	www.ricola.com

Ricola er eit sveitsisk selskap kjend for å laga halspastillar med urter. Dei lagar også urtete.

Ricola-pastillar er eitt av midla ein kan ta ved forkjøling og sår hals.

Verksemda blei starta i 1930 av Emil Wilhelm Richterich som Confiseriefabrik Richterich & Co. Laufen, etter at han hadde kjøpt eit lite bakeri i Laufen utanfor Basel i Sveits. I 1940 skapte Richterich dei første urtepastillane med 13 urteslag som ingrediens. På 1950-talet blei det også utvikla ein urtete etter at ein hadde oppdaga at ein også kunne løysa opp pastillane i varmt vatn. I 1976 laga selskapet den første mjuke, sukkerfrie urtepastillen i Sveits.

I 2004 hadde Ricola rundt 400 tilsette. Samstundes nytta det tenestene til rundt 200 selskap i nærmiljøet. Selskapet eig også fem urtehagar i Zermatt, Kandersteg, Pontresina og Nenzlingen. Hagane dyrkar urter til produksjonen, men kan også vitjast.

Ricola vert importert til Noreg av Galleberg.

Produkt

Ricola lager både mjuke og harde pastillar. Dei blir selde i esker og i posar. Ricola-pastillane er kjende for å innehalda 13 urter, som er: Salvie, apotekerkattost, ryllik, legestokkrose, smalkjempe, peparmynte, gjeldkarve, marikåpe, timian, hylleblom, marianøkkelblom, legeveronika og borremynte. Innhaldet kan variera i dei ulike produkta. Mentol er den aktive substansen i produkta.

Kjelder

• Denne artikkelen bygger på «Ricola» frå Wikipedia på engelsk, den 6. juni 2010.

• Ricola.com