Robert Kotsjarjan
Robert Sedraki Kotsjarjan (armensk Ռոբերտ Սեդրակի Քոչարյան), fødd 31. august 1954 i Stepanakert i Nagorno-Karabakh, er ein armensk politikar, og var president i Armenia frå 4. februar 1998 til 9. april 2008.
Kotsjarjan var ein av leiarane for rørsla i Nagorno-Karabakh som gjekk inn for lausriving frå Aserbajdsjan. Då Nagorno-Karabakh erklærte sjølvstende i 1992 vart Kotsjarjan den første presidenten i utbrytarrepublikken, som har ei nær tilknytning til Armenia.
I 1997 forlet han denne posten då han vart statsminister i Armenia. I 1998 vart han vald til president, etter at forgjengaren vart pressa til å gå av. I 2003 vart Kotsjarjan gjenvald som president. Ved begge presidentvala har det kome anklagar om uregelmessigheiter.
Etter grunnlova hadde ikkje Kotsjarjan høve til å stilla til val til ein tredje periode. Ved presidentvalet 19. februar 2008 støtta han kandidaturet til statsministeren sin, Serzj Sargsian, som vann valet.
Han er gift og har tre born.
| Føregjengar Levon Ter-Petrosian |
President i Armenia 1998–2008 |
Etterfylgjar Serzj Sargsian |
| Føregjengar Armen Sargsian |
Statsminister i Armenia 1997–1998 |
Etterfylgjar Armen Darbinjan |
