Sandøy kommune

Sandøy kommune
Komm.nr.	1546
Fylke	Møre og Romsdal
Adm.senter	Steinshamn
Areal	20 km²
Folkemengd	1 316 (1. jan 2012)
Politikk
Ordførar (2011-)	Hans Endre Sæterøy (H)
Målform	Nynorsk
Nettstad	www.sandoy.kommune.no
Folketalsutvikling 1951-2010
Sandøy kommune på Commons

Sandøy kommune ligg i Romsdal i Møre og Romsdal fylke og grensar til Haram i sør, til Midsund i aust og til Aukra i nord. Kommunen vart skilt ut frå Aukra i 1867, og har sine noverande grenser frå 1965 då den sørlege delen av Harøya som høyrde til Haram vart overført til Sandøy. Sandøy er den nest minste kommunen i Møre og Romsdal etter folketal, noko han har vore sidan Tustna kommune vart slått saman med nabokommunen Aure i 2006.

Administrasjonssenteret i kommunen er Steinshamn, som ligg nord på Harøya.

Det er to kyrkjer i Sandøy kommune; Sandøy kyrkje og Harøy kyrkje som høvesvis er plasserte på Sandøya og Harøya.

Haramsnytt er lokalavis for Sandøy og Haram kommune.

Geografi

Sandøy er ein øykommune, og er den kommunen med minst flatevidd i Møre og Romsdal. Flesteparten av øyane i kommunen er flate og myrlendte, der seks av desse er busette. Harøy på 13,6 km² er den største øya i kommunen og utgjer kring 60 % av flatevidda. Her ligg administrasjonssenter for kommunen og størstedelen av folkesetnaden bur her. Ut mot havet ligg øyane Ona og Husøya, Sandøya og Finnøya ligg nordaust for Harøya, og Orta ligg aust i kommunen. Det høgaste punktet i Sandøy er Harøyburet på 156 moh. som ligg på Harøy.

Kommunevåpen

Kommunevåpenet til Sandøy vart godkjent 1986. Våpenet synar på blå botn tre spissar i sølv som møtest på høgre skjoldkant og illuderer ljos frå fyrtårn.

Kjelder

• Sandøy kommune hjå Allkunne
• Sandøy kommune hjå SNL

Bakgrunnsstoff

• Sandøy kommune
• Kommunefakta Møre og Romsdal frå Statistisk Sentralbyrå