Solund kommune

Solund kommune
Komm.nr.	1412
Fylke	Sogn og Fjordane
Adm.senter	Hardbakke
Areal	228 km²
Folkemengd	854 (1. jan 2012)
Politikk
Ordførar (2011-)	Ole Gunnar Krakhellen (H)
Målform	Nynorsk
Nettstad	www.solund.kommune.no
Folketalsutvikling 1951-2010
Solund kommune på Commons

Solund er ein øykommune vest i Sogn og Fjordane fylke.

Kommunesoge

Solund kommune vart skipa i 1858, frå starten heitte kommunen Utvær. Området hadde før det høyrd til Gulen kommune. Ved skipinga budde det 1384 personar i kommunen. I 1888 vart garden Krakken overførd til Solund frå Hyllestad kommune, og gardsnummer 54-61 overførde til Solund frå Askvoll kommune. Namnet på kommunen vart endra frå Utvær til Sulen i 1890, og i 1923 vart det endra frå Sulen til Solund. Øya Losna vart overførd til Solund frå Gulen kommune i 1964.

Folketalsutvikling

Etter dei store kommunesamanslåingane på 1960-talet vart Solund kommune den minste kommunen i Sogn og Fjordane etter folketal og har vore det sidan, med unntak av åra 1977 til 1979, då Hornindal kommune var mindre. Då folketalet gjekk under 1000 i 1999, vart Solund den einaste kommunen i Sogn og Fjordane med under tusen innbyggjarar, og per 2010 er han endå åleine om dette i fylket.

Folketalsutvikling for Sulen/Solund kommune frå 1920:

1.12.1920	1.12.1930	3.12.1946	1.1.1951	1.1.1961	1.1.1971	1.1.1981	1.1.1991	1.1.2001	1.1.2010
1839a	1882a	1910a	1802a	1655a	1316	1191	1133	937	867

^a Talet omfattar ikkje øya Losna, som var del av Gulen kommune fram til 1964, då ho vart overført til Solund kommune. Øya hadde då 40 innbyggjarar.

Solund sokn og prestegjeld

Solund er eit kyrkjesokn i Ytre Sogn prosti, og det var fram til 2004 eit prestegjeld. Prestegjeldet vart oppretta i 1888 ved at Husøy og Solund sokn vart skilde ut frå Gulen prestegjeld. Tre år etter vart Hersvik skild ut som eige sokn frå Solund sokn. Prestegjeldet hadde sokna Hersvik, Husøy og Solund fram til 2000, då vart dei tre slegne saman til eitt felles sokn som fekk namnet Solund. Frå 2004 har prosten i Ytre Sogn prosti leia prestetensta i Solund, og prestgjeldet er nedlagt. Soknet har tre kyrkjer; Hersvik kyrkje, Husøy kyrkje og Solund kyrkje. Lengre attende i tid har det vore kapell på Utvær og på Lågøy, og i periodar har delar av det som no er Solund sokn høyrd til under Øn sokn i Hyllestad prestegjeld og Vilnes sokn i Askvoll prestegjeld.

Kjende personar frå Solund

• Bernhard Færøyvik båtgranskar

Bakgrunnsstoff

• Kommunefakta Sogn og Fjordane (Statistisk Sentralbyrå)
• Om Solund sokn på nettstaden til Den norske kyrkja

Denne geografiartikkelen som har med Sogn og Fjordane å gjere er ei spire. Du kan hjelpe Nynorsk Wikipedia gjennom å utvide han.