Svetlana Feofanova

Svetlana Feofanova
Verkeleg namn	Светлана Евгеньевна Феофанова
Statsborgarskap	Russland
Fødd	16. juli 1980 (43 år) Moskva
Idrett	friidrett
Tok del i	Sommar-OL 2012, Sommar-OL 2008, Sommar-OL 2004, Sommar-OL 2000
Utmerkingar	Fedrelandets fortjenstordens medalje av 2. klasse, Venskapsordenen

Svetlana Jevgenjevna Feofanova (fødd 16. juli 1980) er ein russisk tidlegare friidrettsutøvar frå Moskva som tevla i stavhopp. Ho vart verdsmeister i øvinga i 2003, og vann EM-gull i 2002 og 2010.

Aktiv

Feofanova vart europameister i München i 2002. Med 4,60 m vann ho føre landskvinna Jelena Isinbajeva som stoppa på 4,55 m. Året etter vann Feofanova gullmedaljen under VM i friidrett 2003 i Paris. Ho svinga seg over 4,75 m, medan Annika Becker frå Tyskland og Jelena Isinbajeva tok dei andre medaljane med høvesvis 4,70 m og 4,65 m.

Den 4. juli 2004 sette Feofanova ny verdsrekord i stavhopp med 4,88 meter i Iraklio i Hellas, hennar livsbeste hopp. Under dei olympiske leikane i Aten i slutten av august stoppa Feofanova etter å ha greidd 4,75 m og teke sølvmedaljen. Olympisk meister vart Jelena Isinbajeva som seg over 4,91 m, ny verdsrekord.

Etter å ha vorte nummer fire i stavhopptevlinga ved EM i friidrett 2006 i Göteborg, fekk ho ein ny medalje under verdsmeisterskapen i Osaka i 2007. Isinbajeva vann VM-gullet med 4,80 m, medan Feofanova vart bronsemedaljør med 4,75 m, same høgda som sølvvinar Kateřina Baďurová frå Tsjekkia. Året etter tok Feofanova ein ny bronsemedalje då ho atter fekk 4,75 m i sluttprotokollen under OL i Beijing, Isinbajeva var heilt suveren med sine 5,05 m.

Feofanova i midten, saman med dei to andre medaljevinnarane i stavhopp under EM 2010 i Barcelona

Også i EM i friidrett 2010 i Barcelona tok Feofanova seg over 4,75 m, men då som den einaste i tevlinga. Dermed tok ho sitt andre EM-gull, åtte år etter det fyrste. Under friidretts-VM 2011 i Daegu stoppa Feofanova atter ein gong på 4,75 m, noko som gav henne bronsemedaljen, Fabiana Murer frå Brasil vann med 4,85 meter. I sitt siste store meisterskap, sommar-OL 2012, rauk Feofanova ut etter å ha rive i alle sine tre forsøk.

Kjelder

• Denne artikkelen bygger på «Svetlana Feofanova» frå Wikipedia på engelsk, den 20. september 2014.
• World Athletics