Andrej Kantsjelskis

Andrej Kantsjelskis

Personleg informasjon
Fullt namn	Andrej Antanassovitsj Kantjelskis
Fødd	23. januar 1969 (55 år)
Fødestad	Kirovograd i Sovjetunionen (no Ukraina)
Høgd	178 cm
Posisjon	Yttermidtbanespelar Skotfot: Høgre
Seniorkarriere*
År	Lag	Kampar	(Mål)
1988-1990	Dynamo Kiev	22	(1)
1990-1991	Sjakhtar Donetsk	21	(3)
1991-1995	Manchester United	123	(28)
1995-1997	Everton	52	(20)
1997-1998	Fiorentina	26	(2)
1998-2002	Rangers	76	(13)
2001	→ Manchester City (lån)	10	(1)
2002-2003	Southampton	1	(0)
2003	Al-Hillal	3	(0)
2004-2005	Saturn Moskva	39	(4)
2006	Krylja Sovetov	24	(1)
Totalt		397	(72)
Landslag
1989-1991	Sovjetunionen	17	(3)
1992	Samveldet av uavhengige statar	6	(0)
1992-1998	Russland	36	(4)
* Seniorklubbkampar og mål berre telt for nasjonal liga

Andrej Antanasovitsj Kantsjelskis (fødd 23. januar 1969) er ein russisk tidlegare fotballspelar, fødd i Kropyvnytskyj i dagens Ukraina. Han er framom alt kjend for sine fire suksessrike sesongar i engelske Manchester United, 1991-95. Kantsjelskis var ein kjapp og arbeidsam kantspelar.

Klubbspel

Kantsjelskis spelte på [[Dynamo Kiev]9 i 1988 og på Sjakhtar Donetsk i 1990. I april 1991 fekk han kontrakt med Manchester United og debuterte for laget 11. mai. Dei neste sesongane skapte han mange sjansar frå sin posisjon på høgrekanten. Han var med om å vinne ligacupfinalen 1992 med 1-0 over Nottingham Forest, og bidrog mykje til at Manchester United vann den engelske ligaen i 1993 og i 1994. Våren 1994 vart han elles utvist i sluttminuttane av ligacupfinalen mot Aston Villa, etter å ha handsa. Aston Villa fekk straffespark og Villa-spissen Dean Saunders fastsette sluttresultatet til 3-1. Sju veker seinare gjekk det mykje betre for United og Kantsjelskis, i FA-cupfinalen vann Manchester-laget heile 4-0 over Chelsea FC. Sesongen 1994/15 var Kantsjelskis lagets toppskårar i ligaen med sin 15 nettkjenningar.

Etter å ha kome på kant med Alex Ferguson, lagsjefen i Manchester United, vart Kantsjelskis sommaren 1995 overført til FA-cupmeisteren Everton FC. I sin fyrste sesong på Everton skåra han 16 mål og vart, med sitt offensive spel, ein populær spelar hos Everton-fansen. Den neste sesongen gjekk det tråare, og i januar 1997 gjekk ferda til den italienske klubben Fiorentina, mot eit vederlag på £8 millionar. Han vart verande i Fiorentina i halvtanna år, ei tid prega av ankelskadar etter å ha vorte utsett for fleire råe taklingar.

Frå hausten 1998 spelte Kantsjelskis på skotske Rangers FC, der han hadde plass i fyrsteellevaren i to sesongar. Han var då med å vinne ligaen og cupmeisterskapen begge sesongane. Etter 2000 fekk han lite speletid og var innom Manchester City og Southampton FC, før han i 2004 reiste til Russland. Her var han aktiv på Saturn Moskva i 2004-05, og i Krylia Sovetov i 2006.

Landslagsspel

Kantsjelskis spelte 23 landskampar for Sovjetunionen i tida 1989-92. I sin tredje landskamp skåra han det fyrste målet då Noreg vart slått 2-0 i ein EM-kvalifiseringskamp 12. september 1990. Hausten 1991 skåra han ytterlegare to mål i EM-kvalifiseringskampar, derimot kom han ikkje på skåringslista under Fotball-EM 1992, der det sovjetiske fotballandslaget gjorde ein bleik figur i lagets siste kampar.

Frå 1993 valde Kantsjelskis å spele for Russland sitt landslag. I åra fram til 1998 deltok han i 36 landskampar. Ein konflikt med landslagssjefen gjorde at han ikkje kom med i troppa til VM i fotball 1994. Gjennom den seks år lange perioden skåra Kantsjekskis fire landslagsmål og deltok i to kampar i EM i fotball 1996. Dermed enda han opp med totalt 59 landslagsoppdrag og 7 mål.

Merittar

• Engelsk ligameister: 1993 og 1994 med Manchester United
• Vinnar av FA-cupen: 1994 med Manchester United
• Vinnar av den engelske ligacupen: 1992 med Manchester United
• Skotsk ligameister: 1999 og 2000 med Rangers FC
• Skotsk cupmeister: 1999 og 2000 med Rangers FC

Kjelder

• eu-football

• Denne artikkelen bygger på «Andrei Kanchelskis» frå Wikipedia på engelsk, den 5. februar 2019.