Arne Åhman

Arne Åhman
Statsborgarskap	Sverige
Fødd	4. februar 1925 Nordingrå
Død	5. juli 2022 (97 år) Umeå
Yrke	friidrettsutøvar
Høgd	176 centimeter

Arne Per Åhman (4. februar 1925–5. juli 2022) var ein svensk friidrettsutøvar frå Nordingrå. Han er mest kjend som tresteghoppar, men tevla også i høgdehopp og lengdehopp. Åhman vart olympisk meister i tresteghopp i 1948. Han vann elles EM-bronse i same øvinga i 1946, og EM-sølv i høgdehopp i 1950.

Aktiv

Åhman vart svensk meister i tresteghopp i 1946 med eit hopp på 15,10 meter. Same sesongen deltok han i europameisterskapen i friidrett i Oslo og tok bronsemedaljen med resultatet 14,96 m. Også i 1947 vart han svensk meister i tresteghopp med sterke 15, 26 m.

Under OL 1948 i London vart han olympisk meister i tresteghopp. Rekkefylgja for deltakarane vart ordna etter alfabetet, Åhman vart til Aahman på engelsk og han fekk såleis hoppe fyrst. Han sette ny svensk rekord i fyrstehoppet med 15,40 m. Etter kvart vart tilløpsbana i stendig dårlegare stand, og ingen av dei andre hopparane klarde å slå Åhmans lengde, så gullmedaljen vart hans.

I 1950 vart Åhman svensk meister i høgdehopp med 1,93 m. Same høgda klarde han også under friidretts-EM i Brussel, noko som gav han sølvmedaljen. I same europameisterskapen kom han elles på femteplass i tresteg-tevlinga.

Arne Åhman under Sommar-OL 1948

Medaljar og plasseringar i internasjonale meisterskap

• EM 1946 i Oslo: Bronsemedalje i tresteghopp – 14,96 m
• OL 1948 i London: Gullmedalje i tresteghopp – 15,40 m, framom George Avery (15,36)
• EM 1950 i Brussel: Sølvmedalje i høgdehopp – 1,93 m, bakom Alan Paterson (1,96 m), samt nr 5 i tresteghopp – 14,48 m
• OL 1952 i Helsingfors: Nr 15 i tresteghopp – 14,05 m

Kjelder

• Denne artikkelen bygger på «Arne Åhman» frå Wikipedia på svensk, den 3. august 2014.