Arnt Hagen

Frå Wikipedia – det frie oppslagsverket
Arnt Hagen
Fødd17. august 1928
Død27. mai 2007 (78 år)
Statsborgar avNoreg
PartiSenterpartiet
Yrkepolitikar
VervStortingsrepresentant 1965–1977
VervLeiar i Bygdefolkets Ungdomsfylking 1959–1963
VervMedlem i Molde bystyre 1963–1967
Alle verv

Arnt Gudleik Hagen (17. august 192827. mai 2007) var ein norsk politikar for Senterpartiet frå Eid i Romsdal og byråkrat i Møre og Romsdal fylkeskommune.

Hagen utdanna seg til sivilagronom ved Norges Landbrukshøgskole og arbeidde deretter frå 1953 i eit års tid som landbrukssjef i Vestnes kommune. Frå 1955 var han avdelingssjef i S/L Nord-Norges salgslag i Harstad og Vadsø. I 1958 tok han over som disponent i Møre og Romsdal Eggsentral, ei stilling han formelt hadde til 1973.

Hagen starta sitt politiske arbeid som fylkessekretær for Bondepartiet i Troms frå 1956 til -58. Deretter var han formann i Bygdefolkets Ungdomsfylking (frå 1962 Senterungdommens Landsforbund), i fem år frå 1959. Valbolken 1964–1967 var Hagen medlem av bystyret i Molde.

Hausten 1965 vart Hagen vald inn på Stortinget for Møre og Romsdal, etter å ha vore vararepresentant i den då avslutta stortingsperioden. Han representerte fylket i 12 år fram til 1977. Til mars 1968 var han medlem av Justiskomiteen, resten av den fyrste valbolken var han med i Sjøfarts- og fiskerikomiteen. Valbolken 1969-73 var han medlem av Kommunalkomiteen, den siste sesjonen også av Valkomiteen. Han heldt fram i Kommunal- og miljøvernkomiteen i heile si siste fireårsperiode, då som nestformann i komiteen. Hagen var medlem av Senterpartiet sitt sentralstyre og formann for programkomiteen i partiet i tida 1973-77.

Frå 1977 til 1994 var Hagen utbyggingssjef i Møre og Romsdal fylkeskommune.

Han gav i 1996 og 1998 ut to minnebøker, I solgangsbris og skjelle og I kamp for distrikta. om sitt arbeid som politikar og byråkrat.

Kjelder[endre | endre wikiteksten]