Bernt I. Håndlykken

Bernt Andreas Ingebrigtsson Håndlykken (22. januar 1881–23. februar 1951) var ein norsk gardbrukar på Handlykken i Hjørundfjord. Han var ordførar 1923–31 i dåverande Hjørundfjord kommune.

Bernt gjekk åra 1901-03 Møre Folkehøgskule i Ørsta og deretter landbruksskule på Gjermundnes i Romsdal. Deretter arbeidde han som kontrollassistent i Fluberg i Oppland, sidan var han nokre år fjøsmeister og vandrelærar for Åsen meieri i Trøndelag og ei kort tid heradsagronom i Trondenes i Troms.

Etter mange år i andre delar av landet, flytta Håndlykken tilbake til heimbygda Urke. Her tok han over drifta av odelsgarden Ivagarden på Handlykken (Halekkja) ved Norangsfjorden. Hausten 1922 vart han vald inn i heradsstyret og attpåtil vald til ordførar. Håndlykken var ein «kunnskapsrik, veltalande og humoristisk» kar. Etter 1931 trekte han seg frå bygdestyringa. Han var sjukleg frå 1933 til han døydde i 1951.

Bernt I. Håndlykken var gift med Tora Olsdotter Viddal. Dei var foreldre til to søner.

Kjelder

• Frå Hjørundfjord. Årsskrift nr. 46, s. 64f. 2024.
• Folketeljing 1920