Bjørkefink

Bjørkefink
Ho og hann. Foto: Marek Szczepanek
Status
Status i verda: Livskraftig Status i Noreg: Livskraftig
Systematikk
Rike:	Dyr Animalia
Rekkje:	Ryggstrengdyr Chordata
Underrekkje:	Virveldyr Vertebrata
Klasse:	Fuglar Aves
Orden:	Sporvefuglar Passeriformes
Familie:	Finkefamilien Fringillidae
Slekt:	Fringilla
Art:	Bjørkefink F. montifringilla
Vitskapleg namn
Fringilla montifringilla Linné, 1758

Bjørkefink (Fringilla montifringilla) er ein fink som finst i skogar nord i Eurasia, men som og kan dukka opp i Nord-Amerika. Han overvintrar ved Middelhavet, i Nord-India, Kina og Japan. Han kan bli sett på låglandet i Sør-Noreg vår og haust.

Bjørkefink

Foto: Svein Jan Hjelmeset

Skildring

Fuglen er om lag 16 cm. Han har same storleik og form som bokfinken. Hannen i sommardrakt, har kolsvart hovud og rygg, rustgult bryst, ein stor rustgul skulderflekk og to kvitgule vengeband. Om hausten og vinteren er hovudet og ryggen brunaktige, med ein kvit nakkeflekk. Hofuglen liknar hannen i vinterdrakt, og kan forvekslast med hofugl av bokfink, men har kvit overgump og to mørke langsgåande render på spissen. Ungfuglen liknar hofuglen.

Fluktlåta er eit kort jekk jekk, når den sit eit kvæææ. Varskurop kvææ eller æææ (mykje likt lokkeropet).

Hekking

Bjørkefinkegg

Bjørkefinkflokk i flukt

Bjørkefinken rugar i bjørkebeltet og høgareliggande barskog, nord for Dovre også i låglandet (uregelmessig låglandshekking sørover). Han hekkar nordover til bjørkeskoggrensa i Finnmark. Der har han reir i tre, som liknar bokfinken sitt, men litt større; hofuglen byggjer reiret av mose, strå, hår og forar det med fine strå, planteull og fjører.

Dei 5-7 egga liknar bokfinken sine, grå eller brungrøne (ein sjeldan gong lyseblå) med brune og svartbrune flekkar.

Levemåte

Bjørkfinken lever av insekt, frø og bær. Han er stand- og trekkfugl. Ein ser fuglen på låglandet i Sør-Noreg hovudsakleg i trekktidene, mars-april-mai og aug.-okt.-nov.

Om vinteren er bjørkefinken å sjå frå vest i Italia og austover. Han overvintrar i varierande tal i Noreg. Populasjonen i Skandinavia gjekk sterkt attende i perioden 2002 til 2012. Forskarane meinte at nedgangen kan vere relatert til klimaendringar.

Bakgrunnsstoff

Wikimedia Commons har multimedia som gjeld: Bjørkefink