Carole Merle

	Carole Merle
	;
Statsborgarskap	Frankrike
Fødd	24. januar 1964 (60 år); Barcelonnette
Yrke	alpinist
Språk	fransk
Høgd	160 centimeter
	Carole Merle på Commons

Carole Merle (fødd 24. januar 1964) er ein fransk tidlegare alpin skirennar frå Barcelonnette i Alpes-de-Haute-Provence som vart verdsmeister i storslalåm i 1993 og vann to VM-sølv og ein OL-sølv i tida 1989-92. Ho vann 22 renn i verdscupen i alpine greiner, alle i yndlingsgreinene super-G og storslalåm.

Aktiv[endre | endre wikiteksten]

Merle vart nummer 11 i storslalåm under Vinter-OL 1984 i Sarajevo og nummer 12 i super-G i VM i alpine greiner 1987 i Crans-Montana. Under vinterleikane 1988 i Calgary vart ho nummer ni i storslalåm og enda på tolvteplass i både super-G og utfor.

Den 6. januar 1988 vann Merle eit storslalåmrenn i Tignes i heimlandet, hennar fyrste siger i eit verdscuprenn. I 1989-sesongen etablerte ho seg i verdstoppen i Super-G, og deretter også i storslalåm. Fram til 27. mars 1993, då ho vann sin 22. og siste siger i Åre i Sverige, sikra ho seg heile seks FIS-pokalar som beste alpine utøvar i super-G og i storslalåm. Super-G-pokalen vann ho fire år på rad, 1989-92, og storslalåm-pokalen i 1992 og 1993.

Merle vann si fyrste internasjonale medalje då ho tok sølvmedaljen i storslalåm i VM i alpine greiner 1989 i Vail i Colorado. To år seinare vann ho ein ny sølvmedalje i VM 1991 i Saalbach-Hinterglemm, der Ulrike Maier frå arrangørlandet Austerrike vann super-G-tevlinga, 11 hundredels sekund framom Merle. Endå ein sølvmedalje i super-G fekk Merle under Vinter-OL 1992 i Albertville.

29 år gammal vann Merle gullmedaljen i storslalåm då den alpine verdsmeisterskapen 1993 gjekk av stabelen i japanske Morioka. Ho deltok i dei olympiske leikane på Lillehammer i 1994, der ho kom på femteplass i storslalåm. Ved sesongslutt la ho opp.

Kjelder[endre | endre wikiteksten]

Sportsboken, aktuelle årgangar

Denne artikkelen bygger på «Carole Merle» frå Wikipedia på tysk, den 19. desember 2014.