Davor Šuker

Davor Šuker
Statsborgarskap	Kroatia, Den sosialistiske føderale republikken Jugoslavia
Fødd	1. januar 1968 (56 år) Osijek
Idrett	fotball
Tok del i	VM i fotball 2002, VM i fotball 1998, VM i fotball 1990, Sommar-OL 1988, EM i fotball 1996
Utmerkingar	Honorary citizen of Osijek

Davor Šuker (fødd 1. januar 1968) er ein kroatisk tidlegare fotballspelar frå Osijek som vann VM-bronse med Kroatia under VM i fotball 1998, ein meisterskap der han vart toppskårar med sine seks nettkjenningar. Midtspissen vann same året meisterligaen med Real Madrid.

Klubbspel

Šuker spelte til 1991 seks sesongar i den jugoslaviske toppserien, frå 1985 på heimlege Osijek og frå 1989 på Dinamo Zagreb. Hausten 1991 flytta han til Spania og var Sevilla-spelar til sommaren 1996. Šuker vart då overført til Real Madrid. I sin fyrste sesong på Real var han med om å vinne den spanske ligaen, og med 24 ligamål enda han også som laget flittigaste målskårar. I mai 1998 fekk han som innbytar spele nokre av sluttminutta då Real Madrid vann meisterligafinalen 1-0 mot italienske Juventus. Sommaren 1999 gjekk Šuker over til engelske Arsenal FC, ein klubb som våren etter tok seg til finalen i UEFA-cupen 2000. Finaleoppgjeret mot tyrkiske Galatasaray enda mållaust. Šuker, som kom på bana i andre ekstraomgang, bomma då han som fyrste Arsenal-eksekutør fekk sjansen i straffetevlinga. Galatasaray vann UEFA-pokalen etter 4-1 i straffeskytinga. Der etter avslutta Šuker si tid som aktiv med ein sesong i West Ham United og to i 1860 München. Våren 2003 la han opp.

Landslagsspel

Šuker debuterte på Kroatia sitt ferske landslag i desember 1990, då Romania gjesta Rijeka til vennskapskamp. I 1991 spelte han to landskampar for Jugoslavia og skåra sitt fyrste landslagsmål då Færøyane måtte tole 0-7 i ein EM-kvalifiseringskamp. Frå oktober 1992 spelte Šuker landskampar for Kroatia og skåra dei neste åra jamt og trutt for landet sitt. Under Fotball-EM 1996 putta han tre mål i dei fire kampane til Kroatia, som rauk ut i kvartfinalane mot den blivande europameisteren Tyskland. To år seinare vart Šuker toppskårar under Fotball-VM i Frankrike, der Kroatia sikra seg tredjeplassen då han vart matchvinnar i bronsefinalen mot Nederland med si 2-1-skåring. Šuker deltok i sin 71. landskamp då Kroatia tapte sin opningskamp i VM i fotball 2002. Midtvegs i den andre omgangen av kampen vart han teken av bana, etter 45 landslagsmål for Kroatia og eitt for Jugoslavia fekk han ikkje fleire landkampar.

Merittar

• VM-bronse: 1998 for Kroatia
• Vinnar av meisterligaen: 1998 med Real Madrid
• Spansk seriemeister: 1998 med Real Madrid
• Tapande finalist i UEFA-cupen: 2000 med Arsenal FC

Kjelder

• Denne artikkelen bygger på «Davor Šuker» frå Wikipedia på engelsk, den 8. juli 2018.

• eu-football