EM i fotball 2004

Frå Wikipedia – det frie oppslagsverket
Gå til: navigering, søk
Deltakarlanda i Fotball-EM 2004

Europameisterskapen i fotball 2004 var den tolvte europameisterskapen i fotball for menn. Meisterskapen vart avvikla i Portugal i tida 12. juni til 4. juli 2004. Hellas vart europameister etter finalesiger 1-0 mot vertslandet Portugal. Dei 31 kampane vart spelt på ti arenaer i åtte byar; Aveiro, Braga, Coimbra, Faro-Loulé, Guimarães, Leiria, Lisboa og Porto. 50 land deltok i kvalifiseringa til meisterskapen.

Portugal tapte opningskampen mot Hellas, men vann likevel gruppe A. Gruppe C var den jamnaste med tre lag på fem poeng, Italia rauk ut med dårlegare målskilnad enn Sverige og Danmark. Med tre rake sigrar imponerte Tsjekkia mest av alle laga i gruppespelet.

I kvartfinalane feia Tsjekkia det danske laget av bana med 3-0 i målprotokollen. Både Portugal og Nederland gjekk vidare til semiifinale etter straffeskyting mot høvesvis England og Sverige. Portugal slo ut Frankrike med gjerrig spel og 1-0. Også i semifinalen mot Tsjekkia vann Hellas med 1-0, medan Portugal eliminerte Nederland etter ein 2-1-siger.

Milan Baroš frå Tsjekkia vart toppskårar i meisterskapen med sine fem nettkjenningar.

Finalen[endre | endre wikiteksten]

Finalen fann stad på Estádio da Luz i Lisboa 4. juli 2004, framfor 62 865 tilskodarar. På sett og vis vart finalen mellom Portugal og Hellas ei reprise på opningskampen i meisterskapen mellom dei same to laga, som hadde enda med ein overraskande siger til Hellas med 2-1. I finalekampen vann Hellas med same siffera som i kvart- og semifinale; 1-0. Det einaste målet i oppgjeret kom etter 57. minutts spel, og vart ekspedert av den høgreiste spissen Angelos Kharisteas. Hellas stod dermed for den største overraskinga i noko fotballmeisterskap for menn. Laget skåra einast sju mål på dei seks kampane det spelte.

Lagoppstillingane i EM-finalen 2004

Hellas sitt vinnarlag bestod av: Antonios Nikopolidis, Georgios Seitaridis, Traianos Dellas, Michalis Kapsis, Panagiotis Fyssas, Angelos Basinas, Konstantinos Katsouranis, Thodoris Zagorakis, Stelios Giannakopoulos, Angelos Charisteas, Zisis Vryzas og Zisis Vryzas. Stylianos Venetidis erstatta Giannakopoulos i det 76. minutt og Dimitrios Papadopoulos kom inn i staden for Vryzas då det var ti minuttar att av kampen.

Portugal: Ricardo Pereira, Miguel Monteiro, Jorge Andrade, Ricardo Carvalho, Nuno Valente, Maniche, Costinha, Deco, Luís Figo, Pauleta og Cristiano Ronaldo. Utover i kampen tok etter tur både Monteiro, Costinha og Pauleta plass på benken, inn på bana kom høvesvis Paulo Ferreira, Rui Costa og Nuno Gomes.

Markus Merk frå Tyskland dømde kampen.

Kjelder[endre | endre wikiteksten]