Einar Sagli

Frå Wikipedia – det frie oppslagsverket
Hopp til navigering Hopp til søk
Einar Sagli
Fødd 30. september 1958
Yrke politibetjent

Einar Sagli (fødd 30. september 1958) er ein norsk politimann og tidlegare friidrettsutøvar som tevla i sprint og i lengdehopp. I tida 1982-88 vann han ti gullmedaljar i norske meisterskap, fordelt på fire i lengdehopp, tre på 200 m og like mange på 100 m. Han var i 1981 medlem i Oslo Politis IL, sidan representerte han IK Tjalve.

Aktiv[endre | endre wikiteksten]

Sagli byrja tevla i friidrett fyrst i vaksen alder. Han tok steget opp mot noregstoppen i 1981-sesongen med eit hopp på 7,40 m. Dei to neste sesongane, 1982 og -83, vart han norsk meister i lengdehopp og stod med høvesvis 7,57 m og 7,54 m, årsbeste i lengde i Noreg begge åra.

I åra frå 1984 til -88 var Sagli i tetsjiktet i Noreg både i lengdehopp og på sprintdistansane 100 m og 200 m. Han vart norsk meister på 200 m i 1984 med personleg rekord 21,40 sekundar. Den 14. juli same sesongen persa han med 7,73 m i lengde i Grimstad, ein personleg rekord han var nær ved å forbetre både i 1985 med 7,72 m, og i 1986 då han atter vart målt til 7,73 m, under eit stemne i Avila. Under NM 1985 i Bærum vann han både 100 m, 200 m og lengdetevlinga, i lengde hoppa han heile 7,90 m i kraftig medvind, men vart tildelt kongepokalen for prestasjonen.

Gjennom 1986-sesongen var Sagli på sitt sprekaste. Den 20. mai vart tredjemann på 100 m på Bislett stadion i Oslo, tida 10,51 vart ståande som hans personlege rekord på distansen. Han imponerte meir då han 21. juni vann 200 m i eit stemne i Luzern og vart klokka inn på 20,95 sekundar, hans livs snøggaste 200-meter.

Etter 1988-sesongen trappa Sagli ned treninga og presterte jamt over på eit stadig lågare niva, men var likevel i stand til å vinne NM-medaljar i lengdehopp. Han la opp i 1993.

Medaljar i norske meisterskap[endre | endre wikiteksten]

  • 1982: Gullmedalje i lengdehopp – 7,56 m, framom Finn Bendixen (7,45 m)
  • 1983: Gullmedalje i lengdehopp – 7,56 m, framom Frode S. Johannessen (7,39 m)
  • 1984: Gullmedalje på 200 m – 21,40, framom Tore Bergan (21,65)
  • 1985: Gullmedaljar på 100 m – 11,03, 200 m – 21,88, og i lengdehopp – 7,90 m/kongepokal
  • 1986: Gullmedaljar på 100 m – 10,71 og 200 m – 21,19
  • 1988: Gullmedaljar på 100 m – 10,58, og i lengdehopp – 7,40 m
  • 1990: Sølvmedalje i lengdehopp – 7,18 m, bak Morten Næss (7,48 m)
  • 1992: Bronsemedalje i lengdehopp – 7,19 m

Kjelder[endre | endre wikiteksten]