Flåm ferjekai

Flåm ferjekai
Kategori	Ferjekai
Underkategori	Enkel kai
Opna	1967
Som del av	Flåm-Aurland-Kaupanger-Årdalstangen
Stad	Flåm
Kommune	Aurland
Fylke	Vestland
Nedlagd	2000 (for offentlege bilferjer)
Erstatta av	Lærdalstunnelen
Flåm ferjekai 60.862643594187°N 7.1139354772541°E / 60.862643594187; 7.1139354772541

Flåm ferjekai er eit ferjeanlegg rett attmed Flåm stasjon på Fretheim i Flåm i Aurland kommune. Den fyrste kaia vart vedteken bygd her av kommunen i 1878, og i 1882 vart Christian Fretheim tilsett som den fyrste bryggjeekspeditøren. I dei tidlegaste rutene inngjekk stoppestaden med namnet Fretheim, som er det eigentlege namnet på området nedst i Flåmsdalen.

Skikkeleg ferjekai og bilførande ferjesamband kom ikkje før i 1967, saman med ny ferjekai ved Aurlandsvangen, då fjellvegen (noverande Fylkesveg 5627) opna mellom Aurlandsvangen og Lærdal. Då fekk ein sambandet Flåm-Aurland-Kaupanger-Årdalstangen, og året etterpå kom Gudvangen-Aurland-Flåm. Sistnemnde samband vart erstatta av Gudvangatunnelen i 1991, medan det attverande ferjesambandet berre gjekk til Kaupanger etter 1993 og vart nedlagd med opninga av Lærdalstunnelen i 2000.

Med dette vart det slutt på bilferjedrift til og frå Flåm i offentleg regi, men kaia er framleis nytta av andre offentlege båtruter, sjå Skyss. I tillegg er kaia nytta av småferjer og båtar i regi av turistnæringa. Større skip nyttar seg av eit større og moderne hamneanlegg om lag 300 meter nordaust for ferjekaia.

Kjelder

• Finn Borgen Førsund (1998). Dampen og kaia : stoppestader for Fylkesbaatane i Sogn og Fjordane 1858-1998. Førde: Selja forlag. s. 144. ISBN 82-91722-04-8. 
• Magnus Helge Torvanger (2008). Frå dampskip til gassferjer : Fjord1 Fylkesbaatane 150 år : 1858-2008. Førde: Selja forlag. s. 75, 76. ISBN 978-82-91722-93-1. 
  Denne geografiartikkelen som har med Vestland å gjere, er ei spire. Du kan hjelpe Nynorsk Wikipedia gjennom å utvide han.