Frode Urkedal

Frå Wikipedia – det frie oppslagsverket
(Omdirigert frå Frode Olav Olsen Urkedal)
Hopp til navigering Hopp til søk
Frode Urkedal
Frode Urkedal 2012.jpg
Fødd 14. mai 1993
Oslo
Yrke sjakkspelar
Frode Urkedal på Commons
Frode Urkedal under NM i sjakk på Hamar 2007

Frode Olav Olsen Urkedal (fødd 14. mai 1993) er ein norsk sjakkspelar frå Oslo, stormeister i sjakk. Han har blitt rekna som eit av dei største talanta i norsk sjakk. Han vart Internasjonal Meister i sjakk i 2011, noregsmeister i sjakk i 2012 og 2014, og så stormeister i 2016. Frode Urkedal som spelar for Schakklubben av 1911.

Vann klassane for miniputt, lilleputt, kadett og junior i NM fire påfølgande år[endre | endre wikiteksten]

Han sette i si tid ein nær uslåeleg rekord under Noregsmeisterskapen i sjakk i åra 2003 til 2006: 10 år gamal vann han i 2003 miniputt-klassa, for dei som er 11 år og yngre. Framleis som miniputt vann han året etter lilleputt-klassa, for dei som er 12-13 år. Som første års lilleputt vann han i 2005 kadettklassa, for dei som er 14-16 år. Og framleis som lilleputt, 13 år gammal, vart han i 2006 junior-noregsmeister i sjakk, klassa for dei under 20 år. Han kvalifiserte seg med dette også for øvste klasse i NM, Eliteklassa. Han vart dermed også den nest yngste junior-Noregsmeisteren i sjakk gjennom tidene. (Berre Einar Hatlebakk, Molde sjakklubb, var nokre månader yngre då han vann NM for junior i 1960.)

Frode Urkedal har delteke i øvste klasse i NM i åra 2007-2015.

Noregsmeisterskapen i sjakk 2010[endre | endre wikiteksten]

I Noregsmeisterskapen i sjakk som blei arrangert i Fredrikstad i juli 2010, imponerte han med delt førsteplass i Eliteklassa, saman med Kjetil A. Lie, Espen Lie og Joachim Thomassen.[1] I stikkamp mellom desse fire for å kåre vinnaren 14-17. oktober 2010 vart han nr. 3, eit poeng etter vinnaren Kjetil A. Lie.[2]

Internasjonal Meister i sjakk 2011[endre | endre wikiteksten]

Frode Urkedal har gjort sterke resultat i mange internasjonale turneringar. I tre av dei var prestasjonane så gode at dei gav han dei nødvendige tre innteikningane i tittelen Internasjonal Meister i sjakk: I Sveins minneturnering i Oslo i juni 2009, der han tok ein andreplass med 6,5 poeng på 9 rundar, i VM i sjakk for Ungdom i Antalaya i Tyrkia i november 2009, der han tok ein femteplass med 8 poeng på 11 rundar i U-16-klassa, og så i desember 2010-januar 2011 i Rilton Cup i Stockholm, der han blei nummer 15 med 5,5 poeng på 9 rundar mot sterk motstand[3]. Etter som han allereie hadde oppfylt kravet om eigen FIDE-rating på 2400, så vart han utnemnd til Internasjonal Meister i sjakk (IM) av Verdssjakkforbundet FIDE på styremøte 5-6. juni 2011. [4].

Noregsmeister i sjakk for 2012 og 2014[endre | endre wikiteksten]

I Noregsmeisterskapen i sjakk i Sandefjord i juli 2012 tok Frode Urkedal 7 poeng på 9 rundar. Det same tok IM Espen Lie.[5] 19-20. oktober 2012 vart det spela stikkamp om kongepokal og noregsmeister-tittel. Frode Urkedal vann det første partiet med kvit, og heldt remis med svart i det andre, og vart dermed noregsmeister.

I Noregsmeisterskapen i sjakk i Trondheim i juli 2014 vart Frode Urkedal på nytt noregsmeister, med 7 poeng av 9 moglege i eliteklassa.[6]

Stormeister i sjakk 2016[endre | endre wikiteksten]

Frode Urkedal tok stormeisternapp i Noregsmeisterskapen i sjakk 2012, og i Eliteserien i sjakk sesongen 2013-2014. I ei turnering på Mallorca i februar 2016 tok han 6 poeng på dei 7 første rundane, noko som gav han det avgjerande tredje stormeisternappet allereie to runder før slutt.[7] Då han har vore over kravet om eigen rating på 2500 sidan august 2014, var alle krav til stormeistertittelen oppfylt, og han vart utnemnd til Noregs 13. stormeister i sjakk av Verdssjakkforbundet FIDE i slutten av mars 2016.[8]

Kjelder[endre | endre wikiteksten]

Bakgrunnsstoff[endre | endre wikiteksten]