Handball-VM 1999 for kvinner

Frå Wikipedia – det frie oppslagsverket
Hopp til navigering Hopp til søk

Verdsmeisterskapen i handball 1999 for kvinner, den 14. i rekka, vart avvikla i tida 30. november til 12. desember 1999 i Noreg og Danmark. Til saman 24 land deltok i turneringa. Noreg sikra seg meisterpokalen etter finalesiger 25-24 mot Frankrike.

VM-finalen[endre | endre wikiteksten]

Finalen mellom semifinalevinnarane, Noreg og Frankrike, vart spelt i Håkons hall på Lillehammer framfor 11 200 tilskodarar. Frankrike leia 10-8 til pause. I andre omgangen veksla laga om å vere i leiinga før omgangen ebba ut med uavgjort 18-18. Også etter to ekstraomgangar stod det likt på resultattavla, 21-21. I tredje ekstraomgang drog vertslandet ifrå og etter fjerde ekstraomgang stod Noreg att som vinnar med siffera 25-24.

Kjersti Grini vart norsk toppskårar med 8 nettkjenningar, vidare skåra Mia Hundvin 5, Kristine Duvholt 4, Susann Goksør Bjerkrheim 3, Birgitte Sættem og Else Marthe Sørlie 2, samt Trine Haltvik 1 mål. I mål for Noreg stod Cecilie Leganger og Heidi Tjugum. Også Mette Davidsen, Elisabeth Hilmo og Tonje Larsen var med på det norske finalelaget, medan Marianne Rokne, Sahra Hausmann, Ann Cathrin Eriksen såg kampen frå tribunen.

Frankrikes målskårarar var Nodjialen Myaro 6, Leila Duchemann (Lejeune) og Nathalie Celambarum 4, Sandrine Mariot (Delerce) og Veronique Pecqueux (Rolland) 3, Isabelle Wendling og Caisa Lerus 2.

Finaledommarane Ramon Gallego og Victor Lamas frå Spania straffa Frankrike med tre 2-minuttsutvisingar og eitt raudt kort, medan Noreg måtte tole fire 2-minuttsutvisingar og eitt raudt kort då Else Marthe Sørlie i tredje ekstraomgang vart utvist for tredje gong.

Kjelder[endre | endre wikiteksten]