Harald Bakke

Harald Bakke
	Harald Bakke
Fødd	30. juni 1882; Halden kommune
Død	11. februar 1963 (80 år)
Statsborgar av	Noreg
Parti	Høgre
Yrke	politikar
Alle verv	stortingsrepresentant (1925–1927); stortingsrepresentant (1928–1930); stortingsrepresentant (1931–1933); stortingsrepresentant (1934–1936) ;

Harald Sigvard Bakke (30. juni 1882–11. februar 1963) var ein norsk lektor, politikar og riksmålsmann frå Halden. Han representerte partiet Høgre på Stortinget i tida 1925-36.

Bakke var son til ein gardbrukar. Han tok examen artium ved Fredrikshalds skole i 1902 og pedagogisk eksamen i 1911. I 1912 vart han cand.philol. med historie, engelsk og norsk frå Det Kongelige Frederiks Universitet i hovudstaden.

Skuleåret 1906/07 var Bakke styrar av Randsfjord private middelskole. Dei neste fem åra underviste han på Sandnes middelskole, før han i 1912/13 var lærar ved Storms skole i Stavanger. Frå 1913 til 1934 var han adjunkt og lektor ved Haldens skole. I 1934 flytta han til Oslo og vart lektor ved Foss skole. Under andre verdskrigen fungerte han som rektor ved Hegdehaugen skole i Oslo.

Bakke var med i formannskapet i Halden i heile 18 år; 1916-34. Åra 1919-25 var han medlem av skulestyret i byen. Frå 1925 til 1936 var han stortingsrepresentant frå kjøpstadene i Østfold og Akershus fylke. Sesjonen 1925-27 var han medlem i Protokollkomiteen, deretter formann i same komiteen 1928-33. Sesjonane 1934-35 var han medlem i Kyrkje- og skulekomiteen. I 1936 vart han overført til Sosialkomiteen.

Bakke var styremedlem i Smaalenenes Amtstidende og i Halden Elektrisitetsverk. Elles var han aktiv på fleire felt, særleg i Riksmålsforbundet. Han var viseformann i forbundet 1938-39 og formann 1939-45.

I 1945 vart Bakke suspendert frå lektorstillinga då han hadde vore medlem i Norges Lærersamband etter læraraksjonen i 1942, og mogleg sympati med okkupasjonsmakta.

Bakke skreiv fleire små verk med lokalhistorie og bedriftshistorie.

Kjelder[endre | endre wikiteksten]

Stortingsbiografi Arkivert 2016-11-14 ved Wayback Machine.