Haris Silajdžić
| Haris Silajdžić | |
.jpg) | |
| Statsborgarskap | Bosnia-Hercegovina |
| Fødd | 1. oktober 1945 (78 år) Sarajevo |
| Yrke | politikar, historikar, universitetslærar |
| Politisk parti | Party for Bosnia and Herzegovina |
| Religion | Sunniislam |
| Ektefelle | Selma Muhedinović |
| Haris Silajdžić på Commons | |
Haris Silajdžić (fødd 1. oktober 1945) er ein bosnisk politikar som var den bosnjakiske representanten i det kollektive presidentskapet i Bosnia-Hercegovina frå 1. oktober 2006.
Silajdžić studerte historie i Priština i Kosovo. Seinare underviste han ved det same universitetet. I 1990 vart han med i toppleiinga i det hovudsakleg bosnjakiske Partiet for demokratisk handling (Stranka Demokratske Akcije - SDA), leia av Alija Izetbegović. Etter at SDA vann det første frie parlamentsvalet i Bosnia-Hercegovina i november og desember 1990 vart Silajdžić utanriksminister. Han fekk dermed jobben med å representera den bosniske regjeringa internasjonalt under den bosniske krigen som braut ut i 1992. Han var statsminister frå 1993 til 1995 og var med i den bosnjakiske delegasjonen som forhandla fram Dayton-avtalen som gjorde slutt på krigen, ein avtale han har vore ein sterk motstandar av sidan krigen.
Silajdžić braut med Izetbegović og melde seg ut av SDA i 1997, og grunnla sitt eige parti, Partiet for Bosnia og Hercegovina (Stranka za Bosnu i Hercegovinu). Han stilte til val som presidentkandidat ved valet i 2002, men vart slått av SDA sin kandidat, Sulejman Tihić. I 2006 stilte han til val igjen, med lovnad om å gjera slutt på delinga av landet i ein bosnisk-kroatisk føderasjon og ein serbisk republikk. Han vann valet, med 40,4 % av røystene mot 17,9 % for Tihić,[1] og vart bosnjakisk representant i det kollektive presidentskapet i Bosnia-Hercegovina.
I valet til ny bosnjakisk representant i presidentskapet, 3. oktober 2010, kom han på tredjeplass med 25,1 % av røystene og mista dermed plassen sin til Bakir Izetbegović.