Heike Drechsler

Heike Drechsler
Statsborgarskap	Tyskland, Den tyske demokratiske republikken
Fødd	16. desember 1964 (61 år) Gera
Idrett	friidrett, Lengdehopp
Tok del i	Friidrett under Sommer-OL 1988 – 100 meter kvinner, Friidrett under Sommer-OL 1988 – 200 meter kvinner, athletics at the 1988 Summer Olympics – women's long jump, athletics at the 1992 Summer Olympics – women's long jump, athletics at the 2000 Summer Olympics – women's long jump
Utmerkingar	Baden-Württembergs fortjenstorden, Fedrelandets fortjenstorden i gull, Grand Star of People's Friendship, Bislett-medaljen, Hall of Fame des deutschen Sports, East German Sportspersonality of the Year, Sparkassenpreis für Vorbilder im Sport, æresborger av Gera, IAAF Hall of Fame

Heike Gabriela Drechsler (fødd Heike Daute, 16. desember 1964) i Gera i Thüringen i det dåverande Aust-Tyskland er ein tidlegare friidrettsutøvar som tevla i lengdehopp og sprint. Drechsler representerte Aust-Tyskland fyrst i karrieren sin, deretter Tyskland etter at muren fall. Hennar personlege rekord i lengdehopp er på 7,48 meter. (Neubrandenburg, 1988) Dette er gjeldande tysk rekord og 4 cm kortare enn verdsrekorden til Galina Tsjistjakova.

Karriere

Heike Daute vart verdsmeister i lengdehopp fyrste gongen i 1983 i Helsingfors, 18 år gamal. Vinnarhoppet hennar vart målt til 7,27 m. I VM i friidrett 1987 tok Heike Drechsler sølv på 100 meter sprint; gullvinnaren vart her Silke Gladisch, også frå DDR. Drechsler tok også bronse i lengdehopp. Frå 1986 til 1998 vart Drechsler europameister i lengdehopp kvar einaste gong EM i friidrett vart arrangert. I tillegg tok ho to EM-medaljar i 200 meter sprint i denne perioden: gull i Stuttgart i 1986 og sølv i Split under EM i friidrett 1990. I Split blei ho slått av landsmannen Katrin Krabbe.

Heike Drechsler debuterte i OL under sommar-OL 1988 i Seoul. Her tok ho bronsemedalje i både 100 meter og 200 meter sprint, (begge finalane vunne av verdsrekordhaldaren Florence Griffith-Joyner), og sølv på lengdehopp. Det vart lengdehopparen Jackie Joyner-Kersee frå USA som vann med å setja ny olympisk rekord på 7,40 m.

Frå og med VM i friidrett 1991 i Tokyo tevla Drechsler for det sameinte Tyskland. Ho tok igjen sølv i lengdehopp bak Jackie Joyner-Kersee. Ho var også med på å ta bronsemedalje i 4 x 100 meter stafett for Tyskland, bak Sovjetunionen og Jamaica. Neste år deltok Drechsler i sommar-OL 1992 i Barcelona, der ho for fyrste gong vart olympisk meister i lengdehopp. Ho hoppa 7,14 og kom framom Inessa Kravets og Jackie Joyner-Kersee. Året etter vart ho verdsmeister under VM i friidrett med eit hopp på 7,11.

Drechsler deltok også under sommar-OL 1996 i Atlanta, men greidde ingen medaljar her. OL-karrieren hennar vart avslutta med sommar-OL 2000 i Sydney, der ho for andre gong vart olympisk meister i lengdehopp.

Kjelder

• Denne artikkelen bygger på «Heike Drechsler» frå Wikipedia på tysk, den 7. september 2012.

• World Athletics
• «Heike Drechsler» (på engelsk). Olympedia. Henta 8. mars 2023.