Heilage Birgitta

Frå Wikipedia – det frie oppslagsverket
Heilage Birgitta

Heilaga Birgitta som motiv på eit alterskap frå Salem kyrkje i Södermanland i Sverige.
Fødd1303
FødestadFinsta
Daud23. juli 1373
DødsstadRoma
Yrkeskribent, filosof, politikar, teolog, memoarforfattar, mystiker
Helgendag23. juli, 23. juli

Birgitta Birgersdotter frå Sverige er kjend som den Heilage Birgitta. Ho var forfattar, teolog, klostergrunnleggjar og helgen. Birgitta var fødd i 1303 som Birgitta Birgersdotter, dotter til Birger Persson og Ingeborg Bengtsdotter. Birgitta døydde den 23. juli i 1373 i Roma. Gjennom foreldra og gemalen Ulf Gudmarsson høyrde ho til dei leiande krinsane i svensk politikk i samtida. Morfaren hennar var syskenbarn til kong Magnus Ladulås. Begge foreldra kom frå folkungætta.

Britemesse den 7. oktober vart feira til minne om henne.

Fødestad[endre | endre wikiteksten]

Birgitta var fødd i 1303. Det har ikkje vore råd å stadfeste fødestaden. Etter tradisjonen vart ho fødd på garden Finsta, vest for Norrtälje i Uppland. Kjelder frå pavestaten nemner gardsnamnet «Frastad», eit namn som har vore tolka som garden Fresta i Vallentuna herad.

Livet i Sverige[endre | endre wikiteksten]

Birgitta får ei openberring. Etter måleri frå mellomalderen.

Då Birgitta var tolv år døydde mora hennar. Faren meinte at han ikkje klarte å gje Birgitta den oppsedinga som passa for ei jente i hennar stilling. Difor vart Birgitta send til svigerinna Katarina Bengtsdotter på garden Aspanäs i Östergötland.

Etter berre nokre år, då ho var tretten, vart Birgitta gift med den atten år gamle Ulf Gudmarsson. Paret budde på garden Ulfåsa i Östergötland. Dei fekk åtte barn saman. Alt som barn fekk Birgitta openberringar. Ein gong såg ho jomfru Maria som sette ei krone på hovudet hennar. I eit anna syn såg ho korleis Kristus vart pint til døde på krossen.

Fromskapen kom til å prega Birgitta og livet hennar saman med Ulf. Mellom anna drog dei på pilegrimsferd til Nidaros og til Santiago de Compostela. På veg heim frå Spania, i den franske byen Arras, vart Ulf sjuk. I ei openberring lova den franske helgenen Sankt Denis Birgitta at mannen hennar ikkje skulle døy.

Attende i Sverige flytta Birgitta og Ulf til Alvastra kloster. Ulf døydde i 1344 (eller i 1346). Arven etter Ulf vart delt på arvingane. Store summar vart òg delte ut til fattige. Sjølv tok Birgitta til å leve eit enkelt liv ved klosteret. Talet på openberringar auka trutt. Ho opplevde seg som 'Kristi brud og talerøyr'. I openberringane fekk ho i oppgåve av Gud, Kristus og Maria å formidle bodskap både til politiske og kyrkjelege leiarar. Birgitta samtala òg med helgenar.

Livet i Roma[endre | endre wikiteksten]

Birgitta reiste til Roma i 1349 for å delta i feiringa av kyrkja sitt jubelår 1350 samt for å få løyve av paven til å grunnleggje ein ny klosterorden. I Roma budde Birgitta fyrst i eit palass ikkje langt unna kyrkja San Lorenzo in Damaso. Paven hadde sidan 1309 residert i Avignon i Frankrike. Birgitta argumenterte for at han måtte vende attende til Roma. Dette skjedde kortvarig mellom 1368 og 1370. I denne tida vart Birgitta sin ordensregel saumfart og godkjend av den heilage stolen.

I 1371, sekstiåtte år gamal, la Birgitta ut på valfart til det heilage landet. Reisa gjekk gjennom Napoli og Kypros. I Napoli døydde sonen hennar, Karl Ulvsson.

Attende i Roma om våren i 1373 var Birgitta svak etter å ha vore sjuk. Den 23. juli døyde ho i Birgittahuset, Casa di Santa Brigida, som ligg like ved Piazza Farnese. Der finst i dag ei kyrkje, eit kloster og ein gjesteheim.

Etter eige ynske vart ho gravlagd i kyrkja San Lorenzo in Panisperna, medan personlege eignelutar vart sende til Sverige. I 1377 gav bispen Alfonso av Jaén ut den fyrste utgåva av openberringane til Birgitta. Birgittaklosteret i Vadstena opna i 1384.

I 1391 vart Birgitta lyst heilag av pave Bonifatius IX. I 1999 vart Birgitta utnemnd til heile Europa sin vernehelgen saman med Katarina av Siena og Edith Stein.

Kjelder[endre | endre wikiteksten]

Bakgrunnsstoff[endre | endre wikiteksten]

Commons har multimedium som gjeld: Heilage Birgitta