Hjalmar Johnssen
Hjalmar Johnssen | |
Statsborgarskap | Noreg |
Fødd | 25. juni 1852 Stavanger kommune |
Død |
28. november 1901 (49 år) |
Yrke | kunstmålar |
Hjalmar Johnssen på Commons |
Hjalmar Johnssen (25. juni 1852–28. november 1901) var ein norsk målar og illustratør.[1]
Johnssen var son av hamnefogd Konrad Johnssen og Margrethe Petrea Blankenborg Prydtz Bang, og bror av forfattaren Peter Rosenkrantz Johnsen. Han var fødd i Stavanger og voks opp i Bergen. Etter å ha fullført latinskulen drog han til sjøs, og blei etterkvart styrmann. I 1875 gjekk han i land og slo seg ned i Christiania, der han var tilsett hjå ein skipsmeklar. Han hadde tileigna seg ein del kunstkunnskapar, og prøvde å livnæra seg som kunstnar frå 1879. Vinteren 1880 var han elev hjå Johan Jacob Bennetter i Stavanger. Han hadde planlagd å studera hjå marinemålaren Vilhelm Melbye i København, men denne døydde før han kunne gjera det. I staden fekk han ein kort studietur til Paris og nokre månader som elev hjå Frits Thaulow i Kragerø i 1882. Johnssen bidrog til å undermåla fleire av verka til Thaulow, som berømte gatepartiet frå Bjørnborgbakken med ungar på kjelke. Sjølv måla han landskapsmåleri og eit portrett av Frits Thaulow under opphaldet. I seinare år var han fleire somrar ved Fredriksvern (Stavern) og i Skudeneshavn på Karmøy. Hjalmar Johnssen måla ei rekkje motiv frå skip, hamner og skjergarden. Han verka også som illustratør, mellom anna i Folkebladet.[1]
I 1890-åra var han formann i Bildende kunstneres fagforening.[1]
Han var gift med Lydia Eugenie Olsen (f. 1848).[1]
Galleri[endre | endre wikiteksten]
-
Jekt 'Svanen' af Sogndal (1883)
-
Etter regn (1886)
-
Losbåt i høy sjø
-
"Viking"s mottagelse i Chicago 12. juni 1893 (1898)
Kjelder[endre | endre wikiteksten]
- ↑ 1,0 1,1 1,2 1,3 Hagemann, Sonja; Sørensen, Einar; Thue, Oscar (20. februar 2017). «Hjalmar Johnssen». Norsk kunstnerleksikon (på norsk bokmål).