Ivar Eikrem
| Ivar Eikrem | |
| Statsborgarskap | Noreg |
| Fødd | 10. august 1898 |
| Død |
18. oktober 1994 (96 år) |
| Yrke | politikar |
| Språk | norsk |
| Politisk parti | Arbeidarpartiet |
Ivar Kornelius Eikrem (10. august 1898–18. oktober 1994) var ein norsk gardbrukar og politikar frå øya Gossa i dåverande Nord-Aukra herad. Han var ordførar 1945-47 i Nord-Aukra og representerte Arbeidarpartiet på Stortinget i tida 1954-1965.
Eikrem var son til ein gardbrukar og fiskar. Han var sjølv fiskar og arbeidde på gard åra 1913 til 1923, bortsett frå eit år folkehøgskulekurs på Aukra i 1918. I 1923 reiste han til Nord-Amerika, der han var bygningsmann og gardsarbeidar i tre. Han vende heim i 1926, og tok i 1927 over farsgarden på Eikrem. Jamsides dreiv han også fiske.
Frå 1934 var Eikrem med i Nord-Aukra heradsstyre, til dess okkupasjonsmakta avvikla det i 1941. Etter fredsslutninga i 1945 var han med i det gjenoppretta heradsstyret til 1959. Han var 1945-47 ordførar og 1952-59 varaordførar i Nord-Aukra.
Hausten 1953 stod Eikrem på tredjeplass på Arbeidarpartiet si stortingsvalliste i Møre og Romsdal og kom inn på Stortinget med stor margin. Både i 1957 og 1961 fekk han fornya tillit hos veljarane i fylket. Alle tolv sesjonane på Tinget var han med i Sjøfarts- og fiskarkomiteen, og som sekretær i komiteen frå 21. november 1961.