Jim Hines

Frå Wikipedia – det frie oppslagsverket
Hopp til navigering Hopp til søk
Jim Hines
Jim Hines 1969 Ajman stamp.jpg
Fødd 10. september 1946
Dumas
Yrke sprinter, friidrettsutøvar, amerikansk fotball-spelar
Jim Hines på Commons

Jim Hines, fullt namn James Ray Hines (fødd 10. september 1946) er ein USA-amerikansk tidlegare friidrettsutøvar som i 1968 sette verdsrekord på 100 meter med 9,9 og 9,95 sekundar og vart olympisk meister på distansen under Sommar-OL 1968 i Mexico-byen.

Jim Hines i 1968

Hines, som var fødd i Dumas i Arkansas og vaks opp i Oakland i California, tangerte i 1967 verdsrekorden på 100 meter, lydande 10,0. På 220 yards sette han same året personleg rekord med 20,2 sekundar. Under den amerikanske meisterskapen (AAU) i Sacramento i juni 1968 vart Hines fyrstemann under 10 sekundar på hundremeteren. I den fyrste semifinalen vann han på tida 9,9 sekundar, ei tid som vart tangert av Charlie Greene i det andre semfinaleheatet. Finalen vart vunnen av Greene og Hines fekk sølv, begge to og fire andre løparar fekk den manuelle sluttida 10,0. Elektronisk tidtaking viste elles at i semfinalane sprang Hines på 10,02 og Greene 10,09 sekundar, medan Greenes vinnartid i finalen var 10,11r, to hundredels sekund fortare enn Hines.

I oktober månad 1968 var det klart for olympiske sommarleikar i Mexico. Hines vann der den fyrste semifinalen og Greene den andre, begge fekk 10,0 i manuell tid. Finaleløpet 14. oktober vart vunne av Hines på offisielt 9,9 sekundar, Lennox Miller frå Jamaica tok sølvet og Charlie Greene fekk bronsen, begge fekk 10,0 i sluttid. Elektronisk tidtaking viste 9,95 sekundar og ny verdsrekord for Hines, ein verdsrekord som vart ståande i 15 år inntil landsmannen Calvin Smith fekk notert 9,93 sekundar i 1983. Hines vann også olympisk gullmedalje i 4 x 100 meter stafett då han var ankermann på USA sitt lag som vann finalen, 0,1 sekund framom Cuba. Dei andre gullvinnarane var Charlie Greene, Mel Pender og Ronnie Ray Smith.

Hines mislukkast fullstendig då han etter Sommar-OL prøvde seg i amerikansk fotball.

Kjelder[endre | endre wikiteksten]