Job Bødtker

Frå Wikipedia – det frie oppslagsverket
Hopp til navigering Hopp til søk
Job Bødtker
Fødd 9. august 1818
Død

12. november 1889

Yrke politikar, jurist

Job Dischington Bødtker (9. august 181812. november 1889) var ein norsk embetsmann og stortingsmann, fødd i Skogn i Nord-Trøndelag. Han representerte TønsbergStortinget i tida 1865-76.

Bødtker var son til oberst i kavaleriet. Sjølv vart han student frå Møllers institutt i Christiania i 1835, og cand.jur. 1840. Han arbeidde i Kyrkjedepartementet frå 1842 til 1853, fyrst som kopist, seinare fullmektig og til sist byråsjef. Etter åtte år som fut Namdalen, fekk han i 1861 byfutembetet i Tønsberg, ei stilling han hadde i fjorten år.

Ved stortinga 1865-66, 1868-69, 1871-73 og 1874-76 vart Bødtker kåra til å representere bykrinsen Tønsberg på Stortinget. Alle stortingsesjonane var han med i Næringskomite nr 2, frå 1871 til -76 som formann i komiteen. Elles var han i 1865-66 sekretær i Komiteen om hjelpekyrkje i Trondheim, 1872-73 medlem i Trykkekomiteen, 1874-75 i Valomiteen og 1875-76 i Røysterettskomiteen. Valbolken 1874-76 hadde han også plass i Lagtinget.

Bødtker var med i tre kongelege kommisjonar; om skulelova i 1871, om utskiping i 1878, og om embetsgardar 1882-88. Han var formann i utskipings-kommisjonen.

Frå 1875 var Bødtker sorenskrivar i Nedre Romerike.

Han var gift med Fredrikke Sophie Sejersted (1825–1892). Ei av døtrene hans, Frederikke Dorothea (1853–1919), gifta seg med seinare statsminister Francis Hagerup.[1]

Bødtker døydde i Fet i Akershus.

Kjelder[endre | endre wikiteksten]

  1. Francis Hagerup biography - Government.no