Johannes Østtveit
| Johannes Østtveit | |||
| Fødd | 18. januar 1927 | ||
|---|---|---|---|
| Død | 9. juli 2013 (86 år) | ||
| Statsborgar av | Noreg | ||
| Parti | Kristeleg Folkeparti | ||
| Yrke | politikar, veterinær | ||
| Utdanna ved | Veterinærhøgskulen | ||
| Alle verv |
| ||
Johannes Østtveit (18. januar 1927–9. juli 2013) var ein veterinær og stortingsrepresentant frå Sauherad. Han representerte Telemark og Kristeleg Folkeparti på Tinget frå 1965 til -73.
Foreldra til Østtveit var skulefolk på Gvarv i Sauherad. Sjølv gjekk han åra 1943-46 på Skien høyere allmennskole. Deretter vart det fem års studiar ved Noregs veterinærhøgskule i Oslo. Ferdig utdanna veterinær i 1951, gjekk han så inn i vitskapleg assistent-stilling ved veterinærhøgskulen. 1954-55 arbeidde han som veterinær i Vang i Hedmark. Dei to neste åra fram til 1957 var han seminveterinær i Gamleby i Sverige. Frå 1957 til 1965 praktiserte han veterinær-yrket i Bø i Telemark.
Østtveit var medlem av kommunestyret i Bø frå 1960 til 1975. I denne perioden leia han fleire kommunale nemnder og råd. Hausten 1965 vart han vald inn på Stortinget for Kristeleg Folkeparti. På Tinget fekk han plass i Administrasjonskomiteen. Etter å ha vorte attvald i 1969 var han dei neste fire åra medlem av Sosialkomiteen.
Han var sterkt engasjert i arbeidet for kristne i Aust-Europa gjennom organisasjonen Misjon bak Jernteppet. Om denne aktiviteten skreiv han Kirkeklokker i natten - vennskap gjennom jernteppet, som kom ut på Lunde Forlag i 1998.