Johannes Vågsnes
| Johannes Vågsnes | |||
| Fødd | 7. mars 1923 | ||
|---|---|---|---|
| Død | 26. februar 2012 (88 år) | ||
| Statsborgar av | Noreg | ||
| Parti | Kristeleg Folkeparti | ||
| Yrke | politikar | ||
| Alle verv |
| ||
Johannes Vågsnes (7. mars 1923–26. februar 2012) var ein gardbrukar og lærar frå Tromøy i Aust-Agder som i tida 1973-85 representerte Aust-Agder og Kristeleg Folkeparti på Stortinget.
Vågsnes var son til ein gardbrukar. Sjølv var han klokkar i Tromøy meinigheit frå 1945 til -77. I 1946 tok han over garden Gjerstad i Tromøy og dreiv denne til 1985. Åra frå 1951 til -62 var han også lærar i folke- og framhaldsskulen i Tromøy.
Perioden 1952-55 var Vågsnes medlem i Tromøy heradsstyre. Etter to periodar utanfor lokalpolitikken, kom han tilbake som formannskapsmedlem frå 1964 til 1971. Hausten 1973 vart han vald til stortingsrepresentant frå Aust-Agder for Kristeleg Folkeparti. På Tinget var han i alle tolv åra medlem i Kommunal- og konstistusjonskomiteen, nestformann 1977-81 .
Gjennom åra sat Vågsnes i fleire ulike framskotne posisjonar. Han var formann 1973-75 i fylkeslandbruksstyret i Aust-Agder, medlem 1975-79 i representantskapet i Noregs Bondelag og ordførar 1975-81 i representantskapet i Norske Eggsentraler. Sidan var han leiar i Hovudkomiteen for lokalforvaltninga 1980 og i Rådet for Hardangervidda 1986-91.