Johs. Bjøringsøy

Johannes Olai Kristiansson Bjøringsøy (14. mars 1891–3. juni 1961) var ein norsk fiskar, gardbrukar og bygdeleiar frå Hopen på Nordmøre. Han var i sju år ordførar i tidlegare Hopen kommune og 1946-59 ordførar i dåverande Hjørundfjord kommune. Han var medlem i Det norske arbeidarpartiet.

Bjøringsøy budde i 1920 ved Steinøysundet nord på øya Smøla, der han dreiv fiske frå eigen motorbåt. Sidan vart han bureisar på Frostaheia i det indre av Smøla. Frå 1935 til han vart avsett i 1941, var han ordførar i Hopen kommune. Han var då enkjemann. I 1942 gifta han seg med Anna T Hole frå Knutegarden på Bjørke, og flytta dit. Med fyrstekona Beret og Anna vart han far til fem born.

Bjøringsøy var ein handlekraftig kar. Etter verdskrigen var over, vart han vald til ordførar i Hjørundfjord, eit ombod han hadde i 14 år. Det vart mange lange arbeidsdagar, reiste heimanfrå med rutebåten klokka 6, kom gjerne heim med båten i 22-tida. I 1947 var han med å skipe Hjørundfjord Kraftlag, var styreformann i laget til 1958. Elles var han frå 1948 ein pådrivar i LL Tussa Kraft. I 1960 tok han til i stillinga som likningssjef i Hjørundfjord.

Han omkom ein sommardag i 1961, då han med den nyleg innkjøpte traktoren velta ut i elv ved Saursvatnet.

Kjelder

• Frå Hjørundfjord. Årsskrift nr. 46, s. 75ff. 2024.
• Folketeljing 1920