Løparen Bronisław Malinowski

Frå Wikipedia – det frie oppslagsverket
Hopp til navigering Hopp til søk
Løparen Bronisław Malinowski
BronekMalinowski.JPG
Fødd 4. juni 1951
Nowe
Død

27. september 1981
Grudziądz

Yrke langdistanseløpar, friidrettsutøvar
Løparen Bronisław Malinowski på Commons
Bronislaw Malinowski i 1976

Bronisław Malinowski (4. juni 195127. september 1981) var ein polsk friidrettsutøvar. Han vart europameister i 3 000 meter hinder i 1974 og 1978, og olympisk meister i same øvinga i 1980. Malinowski var polsk rekordhaldar på 3 000 m hinder med 8.09,1 og på 5 000 m med 13.17,6, begge oppnådd i 1976-sesongen. Han var oppkalla etter den samnemnde, verdskjende sosialantropologen.

Aktiv[endre | endre wikiteksten]

Ettersom det var hard konkurranse om ein plass på tremanns-laget mellom dei polske hinderløparane deltok Malinowski ved friidretts-EM 1971 i Helsinki på 5 000 meter, der han kom på åttandeplass og sette polsk rekord med 13.39,4. Få veker etter EM vann Malinowski hinderløpet i landskampen Finland-Polen og tangerte den ferske polske rekorden til Kazimierz Maranda på 8.28,2, også det på olympiastadion i Helsinki.

Den 10. august 1972 var Malinowski nær ved å tangere verdsrekorden til Kerry O`Brien på 3 000 m hinder, då han i landskampen Polen-Frankrike vart klokka inn til 8.22,2, fattige to tidels sekund over rekordtida. Vel tre veker seinare vart han fjerdemann i hindertevlinga under sommarleikane 1972 i München.

I 1974-sesongen forbetra Malinowski den polske hinderrekorden fleire gongar. Fyrste gongen til 8.21,2, deretter til 8.20,4 og ytterlegare til 8.19,2. Under europameisterskapen lukkast han å halde favoritten Anders Gärderud bak seg på oppløpssida og vann gullmedaljen på tida 8.15,0, eitt sekund bak verdsrekorden til Ben Jipcho. Same året forbetra Malinowski også den polske rekorden på 5 000 m til 13.28,0.

Dei to neste sesongane kjempa Malinowski og Gärderud om å vere den fremste hinderløparen i verda. Rivaliseringa vart avslutta med at Malinowski tok sølvmedaljen i Sommar-OL 1976, der Gärderud vann gullet og sette verdsrekord med 8.08,0, Malinowski fekk 8,09,1 i sluttid i sitt livs snøggaste hinderløp. Tidlegare i OL-sesongen gjorde han også sin beste 5 000 m då han på Stockholm stadion kom i mål på 13.17,6, polsk rekord det òg.

I 1978 forsvarte Malinowski EM-tittelen på 3 000 m hinder. Men høgdepunktet for Malinowski kom under sommarleikane 1980 i Moskva, då han sikra seg gullmedaljen i 3000 m hinder, etter å ha hengt på løpsleiaren Filbert Bayi og lett spurta frå tanzanianaren på sisterunden.

Malinowski omkom 30 år gammal i eit bilkrasj på ei bru i Grudziądz, ei bru som i dag er oppkalla etter han.

Medaljar og plasseringar i internasjonale meisterskap[endre | endre wikiteksten]

  • EM 1971 i Helsinki: Nr 8 på 5 000 m – 13.39,4
  • OL 1972 i München: Nr 4 i 3 000 m hinder – 8.28,0
  • EM 1974 i Roma: Gullmedalje i 3 000 m hinder – 8.15,0, framom Anders Gärderud (8.15,4)
  • OL 1976 i Montreal: Sølvmedalje i 3 000 m hinder – 8.09,1, bakom Anders Gärderud (8.08,0)
  • EM 1978 i Praha: Gullmedalje i 3 000 m hinder – 8.15,0, framom Patriz Ilg (8.16,9)
  • OL 1980 i Moskva: Gullmedalje i 3 000 m hinder – 8.09,7, framom Filbert Bayi (8.12,5)

Kjelder[endre | endre wikiteksten]

  • Friidrott, aktuelle årgangar.