Månekåsen

Springaren Månekåsen (etter spelemannen Sveinung Månekåsa frå Seljord) er mykje nytta i austre Telemark og i Numedal. Slåtten er òg kalla Makalausen eller Løytnantdrengen. Det siste namnet knyt slåtten til Pål Løytnantsdreng frå Numedal, eller far hans, Knut Øyanhaugen, som tente som løytnant i Tønsberg i unge år. I Telemark er slåtten rekna som Gibø-tradisjon, etter mellom anna Johannes Dale og Eilev Smedal.

Variantgruppa

Slåttegruppa har katalognummer 506 i hardingfeleverket. Tre variantar er samla i Seljord, og tre i Numedal, i tillegg til ein frå Tinn. Slåtten har òg vore bruka i Krødsherad, under namnet Leirplassingen (Johan Kleven, ikkje teken med i lista). Leirplassingen er elles eit namn knytt til nr 528, ein variant av springaren Falkeriset.

• a: Gibøspringar, etter Johannes Dale, Tinn [1]. Slåtten er òg kalla Syrgjefuen. Nedskrift Eivind Groven 1961 etter opptak i NRK (G 1271, NRK magn. 1980). Tradisjon etter Håvard Gibøen.

• b: Springar, etter Hans Smeland, Seljord [2]. Nedskrift Arne Bjørndal 1911 (B 816). Smeland hadde slåtten etter Kjetil Håvardsson, son av Håvard Gibøen. Forma er heller knapp, og manglar det siste veket.

• c: Månekåsen, etter Magne Manheim, Seljord [3]. Nedskrift Sven Nyhus 1976. Oppkalla etter Sveinung Månekåsa frå Seljord.

• d: Gibøspringar/Makalausen, etter Eilev Smedal, Seljord [4]. Nedskrift Eivind Groven 1936 (G 364) Groven spela inn slåtten for NRK i 1949.

• e: Løytnantdrengen, etter Steingrim Haukjem, Veggli [5]. Nedskrift Eivind Groven 1960 (G 1180). Slåtten er og kalla Tangeslåtten.

• f: Løytnantdrengen, etter Halvor Kaasin, Nore [6]. Nedskrift Sven Nyhus 1976.

• g: Tangeslåtten, etter Hellik Juveli, Flesberg [7]. Nedskrift Sven Nyhus 1976. Slåtten har namn etter spelemannen Torstein Tangen frå Flesberg.