Margay
| Margay | |
 Margay | |
| Utbreiing og status | |
Status i verda:  Nær truga Utbreiinga av margay | |
| Systematikk | |
| Rike: | Dyr Animalia |
| Rekkje: | Ryggstrengdyr Chordata |
| Underrekkje: | Virveldyr Vertebrata |
| Klasse: | Pattedyr Mammalia |
| Orden: | Rovpattedyr Carnivora |
| Familie: | Kattefamilien Felidae |
| Slekt: | Leopardus |
| Art: | Margay L. wiedii |
| Vitskapleg namn | |
| Leopardus wiedii | |
Margay (Leopardus wiedii) er eit lite kattedyr som lever i Mexico, Mellom-Amerika og Sør-Amerika. Arten er hovudsakleg nattaktiv og einsleg, og held til i tette skogar med eviggrøn eller lauvfellande vegetasjon.
Margay vart tidlegare jakta intensivt for pelshandel og som kjæledyr. Sjølv om slik jakt no er forboden i dei fleste land, har bestanden gått tilbake som følgje av tidlegare forfølging og pågåande tap av leveområde. Arten har sidan 2008 vore klassifisert som nær truga på IUCN si raudliste.
Artsnamnet wiedii vart gjeve av den sveitsiske naturforskaren Heinrich Rudolf Schinz i 1821 til ære for Maximilian zu Wied-Neuwied, som samla inn eksemplar av arten i Brasil.
Kjenneteikn
[endre | endre wikiteksten]Margay liknar mykje på ocelot (Leopardus pardalis), men har kortare hovud, større auge og lengre hale og bein. Kroppslengda er 48–79 cm, halen er 33–51 cm lang, og vekta varierer frå 2,6 til 4 kg.[1]
Pelsen er brun med talrike mørkebrune eller svarte rosettar og langsgåande teikningar. Undersida er lysare, frå gulbrun til kvit. Halen har fleire mørke band og svart halespiss. Baksida av øyra er svart med ein tydeleg kvit flekk i midten.[2]
Føde
[endre | endre wikiteksten]Kosthaldsstudiar, baserte på analysar av mageinnhald og avføring, viser at margay et ei rekkje små byttedyr. Han tek mellom anna små primatar som silkeaper, tamarinar, ekornaper og titiaper, mange artar av fuglar og øgler, samt egg og ungar frå desse. Arten et òg små slangar, trefroskar og ulike leddyr.[3]
Margay jaktar mest på dyr som lever i trea, til dømes ekorn, og kan både leve og jakte nesten all føde i trekronene. I tillegg er gras, frukt og anna plantemateriale funne i kosten.
Sjølv om arten hovudsakleg held til i trekronene, går han stundom ned på bakken og kan då ta jordlevande byttedyr som agutiar, beltedyr, gnagarar i marsvinfamilien og gnagaran paca.[2]
Utbreiing og leveområde
[endre | endre wikiteksten]Margay finst frå dei tropiske låglanda i Mexico gjennom Mellom-Amerika og sørover aust for Andesfjella til Brasil og Paraguay. Utbreiingsområdet strekkjer seg òg inn i Uruguay og nordaustlegaste og nordvestlegaste delar av Argentina.
Arten lever nesten utelukkande i tett skog, mellom anna i tropisk regnskog, tropisk tørr skog og i høgtliggande tåkeskog. Han er òg observert i kaffi- og kakaoplantasjar.[2]
Kjelder
[endre | endre wikiteksten]- Denne artikkelen er byggjer på «Margay» frå Wikipedia på engelsk, den 19. juni 2026
- ↑ «Leopardus wiedii (Margay)». Animal Diversity Web.
- 1 2 3 Sunquist, M.; Sunquist, F. (2002). Wild Cats of the World. Chicago: University of Chicago Press. s. 135–141. ISBN 0-226-77999-8.
- ↑ Wang, E. (2002). «Diets of Ocelots (Leopardus pardalis), Margays (L. wiedii), and Oncillas (L. tigrinus) in the Atlantic Rainforest in southeast Brazil». Studies on Neotropical Fauna and Environment 37 (3): 207–212. Bibcode:2002SNFE...37..207W. doi:10.1076/snfe.37.3.207.8564.
Bakgrunnsstoff
[endre | endre wikiteksten]
- (en) margay i Catalogue of Life
- (en) margay i Encyclopedia of Life
- (en) margay i Global Biodiversity Information Facility
- (en) margay hos Fossilworks
- (en) margay hos ITIS
- (en) margay hos NCBI
- (en) Kategori:Leopardus wiedii – bilete, video eller lyd på Wikimedia Commons
- (en) Leopardus wiedii – galleri av bilete, video eller lyd på Wikimedia Commons
- Leopardus wiedii – detaljert informasjon på Wikispecies
