Milcah Cheywa

Frå Wikipedia – det frie oppslagsverket
Hopp til navigering Hopp til søk
Milcah Cheywa
Milcah Cheiywa 2010-06-04 Bislett Games 062.jpg
Milcah Cheiywa på Bislett stadion i 2010
Fødd 24. februar 1986 (34 år)
Mount Elgon District
Yrke friidrettsutøvar
Milcah Cheywa på Commons

Milcah Chemos Cheywa (fødd 24. februar 1986) er ein kenyansk tidlegare friidrettsutøvar som vart verdsmeister i 3 000 meter hinder i 2013. Ho har elles vunne tre bronsemedaljar i øvinga, to i verdsmeisterskap og ei i OL 2012.

Cheywa tevla i fleire år på mellomdistansane. Då ho ikkje lukkast hevde seg mot dei beste i heimlandet, satsa ho frå 2009 på 3000 meter hinder. I VM i Berlin same året kom ho på tredjeplassen med personleg rekord 9.08,5, slått i spurten av spanske Marta Domínguez (som fekk gullmedaljen annullert i 2015) og russiske Julija Zaripova. I 2010 vann Cheywa hinderløpet både i afrikameisterskapen i Nairobi og i samveldeleikane i New Delhi. Meir imponerande var prestasjonane i diamantserien (DL), der ho vann fire av hinderløpa; i Oslo, Roma, Eugene, London, og vart nummer to i dei tre andre.

Året etter kom Cheywa som storfavoritt til VM 2011 i Daegu, etter som ho hadde vunne alle dei fem hinderløpa i diamantserien ho hadde delteke i. I Daegu måtte ho sjå seg slått med ti sekundar av Julija Zaripova (som fekk gullmedaljen annullert i 2016) og fem av Habiba Ghribi på sølvplass, men ho vann spurten om bronsemedaljen.

OL-sesongen 2012 var Cheywa like dominerande i diamantserien som før, med sigrar i Shanghai, Eugene og Oslo. Under Bislett-leikane i Oslo sette ho også afrikarekord med 9.07,1. Hinderløpsfinalen ved Sommar-OL London enda på sett og vis ganske likt med VM 2011; Zaripova braut målsnøret og stod øvst på sigerspallen, for så å få annullert prestasjonen i 2016, medan Ghribi fyrst fekk sølv med sine 9.08,3 og så verte tildelt gullmedaljen i Rabat i 2016. Cheywa som opphavleg vart nummer fire, fire hundredels sekund bak etiopiske Sofia Assefa, rykte då opp på bronseplass.

Under VM 2013 vann Cheywa gullmedaljen i 3 000 m hinder på årsbeste i verda, knapt sekundet framom landskvinna Lydia Chepkurui, med Sofie Assefa på tredjeplass. Sommaren 2014 tapte Cheywa spurten mot landskvinna Purity Cherotich i hinderløpet då samveldeleikane fann stad i Glasgow.

Medaljar og plasseringar i internasjonale meisterskap[endre | endre wikiteksten]

  • VM 2009 i Berlin: Bronsemedalje – 9.08,5, bak Julija Zaripova (9.08,3)
  • VM 2011 i Daegu: Bronsemedalje – 9.17,1, framom Mercy Wanjiku (9.17,8)
  • OL 2012 i London: Bronsemedalje – 9.09,88, bak Sofia Assefa (9.09,84)
  • VM 2013 i Moskva: Gullmedalje – 9.11,6, framom Lydia Chepkurui (9.12,5)

Kjelder[endre | endre wikiteksten]