Hopp til innhald

Noah Ngeny

Frå Wikipedia – det frie oppslagsverket
Noah Ngeny
Statsborgarskap Kenya
Fødd 2. november 1978 (45 år)
Eldoret
Yrke mellomdistanseløpar, friidrettsutøvar
Språk engelsk
Høgd 182 centimeter

Noah Kiprono Ngeny (fødd 2. november 1978) er ein kenyansk tidlegare mellomdistanseløpar.

Noah Ngeny tok ikkje til å springa aktivt før i 1996, men verda fekk auga opp for han allereie i 1997, då han sette to junior-verdsrekordar på respektive 1500 meter og ei engelsk mil. Ngeny heldt fram med å trena og betra forma si dei fylgjande åra.

Den 7. juli 1999, då Hicham El Guerrouj sette ny verdsrekord på ei engelsk mil i Roma, kom Ngeny på andreplass, og sprang også raskare enn den førre verdsrekorden. Hicham El Guerrouj sin rekord er framleis gjeldande, og resultatet til Ngeny er framleis verdas nest-raskaste engelske mil. Seinare same sesongen var det VM i friidrett i Sevilla. Her tok Noah Ngeny sølvmedalje på 1500 meter, berre slått av El Guerrouj. 5. september 1999 i Rieti i Italia sette Noah Ngeny ny verdsrekord på 1000 meter på 2,11.96. Denne rekorden står framleis i dag.

Noah Ngeny OL-debuterte under sommar-OL 2000 i Sydney. Her vann han olympisk gull på 1500 meter rett framfor Hicham El Guerrouj, og sette samtidig ny og gjeldande olympisk rekord på distansen. Etter Sydney-OL gjekk karrieren til Ngeny nedover, m.a. fordi han vart utsett for ei bilulukke i november 2001. I 2006 kunngjorde Noah Ngeny at han offisielt la toppidretten på hylla.