Noan Gauslaa
| Noan Gauslaa | |||
 | |||
| Fødd | 11. oktober 1864 | ||
|---|---|---|---|
| Død | 17. juli 1952 (87 år) | ||
| Statsborgar av | Noreg | ||
| Parti | Venstre | ||
| Yrke | politikar | ||
| Alle verv |
| ||
Noan Christian Gauslaa (11. oktober 1864–17. juli 1952) var ein lærar, avisleiar og stortingsmann frå Lillesand i Aust-Agder. I politikken representerte han partiet Venstre.
Gauslaa var son til ein smed og skipsreiar. Sjølv vart han student i 1882 og cand. mag. i 1891. Han var lærar ved Risør kommunale mellomskule frå 1893, til han i 1899 vart styrar av Askim kommunale høgre allmennskule. Mindre enn to år seinare fekk han same stilling i heimbyen Lillesand, denne stillinga røkta han til 1935.
Gauslaa var medlem av bystyret både i Risør og i Lillesand. Frå 1907 var han ordførar i Lillesand utan avbrot til 1937. Også skulestyreformann i Lillesand ei tid, og styreleiar for Lillesand-Flaksvandbanen. Frå 1901 var Gauslaa både utgjevar og redaktør av venstreavisa Lillesands-Posten, posisjonar han hadde heilt til han døydde 51 år seinare.
Gauslaa var krinsen Sand sin representant på Stortinget i tre periodar; 1906-09 og 1913-18. I den første valbolken var han medlem av næringskomite nr. 2, i dei to siste var han sekretær i Odelstinget og medlem av næringskomite nr 1. Periodane 1922-24 og 1928-33 var han fyrste varamann på Tinget for Aust-Agder fylke. Åra 1922-24 hadde han korte innhopp for Værland, medan han møtte fast frå 15. februar 1928 til 12. mai 1931, den tida partikollegaen Johan Ludwig Mowinckel var statsminister. I desse vel tre åra hadde Gauslaa sete i utanriks- og konstitusjonskomiteen.
Kjelder[endre | endre wikiteksten]
- Lindstøl, Tallak:Stortinget og Statsraadet 1814-1914. Kristiania, 1914
- Stortingsbiografi Arkivert 2013-09-21 ved Wayback Machine.
- Biografi i Lillesands-Posten Arkivert 2013-09-21 ved Wayback Machine.