North Petherton

North Petherton
by
Land	England
Region	Somerset
Distrikt	Sedgemoor
Folketal	10 050 (2021)
Postnummer	TA6
Retningsnummer	0 1278
North Petherton 51.091°N 3.013°W / 51.091; -3.013
Wikimedia Commons: North Petherton

North Petherton er ein liten by i Somerset i England. Han ligg i den austlege utkanten av fjellområdet Quantocks, og ikkje langt frå Somerset Levels.

Byen vart grunnlagd seinast på 900-talet og var viktig i angelsaksisk tid, men var ein landsby heilt fram til 1900-talet. Han var då ein av dei største stadane i landet som hadde status som landsby. I Domesday Book (1086) er staden nemnt som Nortperet. Namnet kjem av at han ligg på nordsida av elva Parrett. Sentrum er definert som eit Area of archaeological potential, og fleire bygningar er verna.

I nyare tid er North Petherton først og fremst ein soveby for Bridgwater som ligg fem kilometer mot nord, og Taunton 14 km mot sørvest. Han ligg ved ein av dei historiske rutene gjennom Somerset, og 1730-åra vart det opna ein hovudveg mellom Bridgwater og Taunton gjennom North Petherton. I 1970-åra vart M5 opna, noko som både førte til færre trafikkproblem i sentrum og gjorde byen meir attraktiv for pendlarar. Fleire nye bustadområde har kome etter dette. Byen ligg òg ved turvegen Macmillan Way.

St Mary-kyrkja i North Petherton.

Foto: Trevor Willis

Soknekyrkja St Mary the Virgin har eit 36 meter høgt tårn, som reknast for å vere eit av dei høgaste i West Country. Det meste av kyrkja er frå 1400-talet. Kyrkjeklokka vart laga i Bridgwater i 1807.

Det årlege North Petherton Carnival er ein del av West Country Carnival, og finn stad på søndagen etter første tirsdag i november.

Under den engelske borgarkrigen var det i august 1644 ei mindre trefning utanfor landsbyen, på staden der Fore Street no går mellom Community Centre og det tidlegare George Inn.

Kjelder

• Denne artikkelen bygger på «North Petherton» frå Wikipedia på bokmål, den 18. juli 2011.

Bakgrunnsstoff

Commons har multimedium som gjeld: North Petherton