Oskar Sylte Mineralvannfabrikk

Frå Wikipedia – det frie oppslagsverket
Hopp til navigering Hopp til søk

Oskar Sylte Mineralvannfabrikk AS er ein mineralvassprodusent i Molde, grunnlagd i 1929. Aksjeselskapet har i dag 90 tilsette, og hadde ein omsetnad på 270 millionar kroner i 2003, med eit overskot på 15,5 millionar. Det mest kjende produktet deira er «brus med ananassmak».

Oskar Sylte Mineralvannfabrikk

Historie[endre | endre wikiteksten]

Starten for fabrikken fann stad i Molde i 1929. Oskar Sylte (1905–1974) kom til byen som ungdom, og etablerte eigen agentur- og kommisjonsforretning etter å ha vore visargut i ulike lokale firma. Han dreiv med fisk, vilt og is, hadde eige ishus på Romsdalsmuseet, og leverte ferskmat til alle turistskip som ankom byen. Oskar Sylte tente store penger på fisk eit år makrellen hadde svikta på Sørlandet, og 24 år gammal kjøpte han inn maskinar til brusproduksjon i den gamle meierigarden i Molde.

Etterkvart slutta han med kjøt og fisk, og konsentrere seg om brusproduksjon. I tillegg hadde han ølagentur for Frydenlunds Bryggeri i Oslo. Då Oskar Sylte måtte velje mellom øl- og brusproduksjon, valde han det siste.

Bombinga av Molde under krigen i 1940 ramma også Sylte. Etter gjenoppbygginga fortsette han verksemda i Kirkebakken, og bygde seinare eit nytt fabrikklokale i Vektergata. På 1960-talet utvida Sylte marknadsområdet frå Romsdal til Nordmøre og Sunnmøre. Seinare blei det også etablert eit stort lager i Ålesund.

Gründeren Oskar Sylte dreiv verksemda gjennom fleire tiår. På 1960-talet kom sønene Steinar og Oskar Dag inn som høvesvis administrerande direktør og salssjef. Seinare blei Steinar styreformann og Oskar Dag adm. direktør.

I 1973 flytta Sylte verksemda frå Molde sentrum til eit nytt og større lokale på Årø, eit stykke utanfor byen. Nokre kritikarar meinte at det var urealistisk og naivt å byggje eit så stort anlegg, men bygget er seinare blitt utvida fleire gongar, og er i dag dobbelt så stort som det var i 1973.

Gunstige sukkerkontraktar Steinar Sylte gjorde på tida då bygget blei reist, hjelpte verksemda seinare. Like etter steig nemleg sukkerprisane kraftig.

I 1989 gjorde Sylte-brørne ein avtale med Ringnes og slapp konsernet inn på eigarsida med ein del på 44 prosent. Det tydde at dei hadde kontrollen lokalt. I utgangspunktet forhandla brørne med Hansa i Bergen, men Ringnes gav dei ein betre avtale.

Brus[endre | endre wikiteksten]

«Flaggskipet» til verksemda er brus med ananassmak. Han er like gammal som verksemda sjølv. Verksemda er også ein del av Solo-historia i Noreg. Oskar Sylte var ein av gründerane bak Solo, som blei introdusert i 1934, og produserte brusen frå dag éin. Produktet blei marknadsført under slagordet «Syltes Solo først som tørst». Verksemda er framleis medeigar i Solo.[1]

Eit anna populært produkt frå eigen stall er brus med pæresmak, som er lett gjenkjenneleg med den knallgrøne fargen.

På byrjinga av 1960-talet byrja fabrikken å tappe Pepsi-Cola, som fekk stor tyding for verksemda. Pepsi blei i ein periode erstatta av erkerivalen Coca-Cola. I dag tappar Sylte igjen Pepsi.

Tidleg på 1970-talet drog Steinar og Oskar Dag Sylte til London og inngjekk ein avtale med mineralvassgiganten Schweppes. Den har òg hatt stor tyding for verksemda.

Sjå også[endre | endre wikiteksten]

Fotnotar[endre | endre wikiteksten]

  1. Pettersen (09.05.2009). «Gammel og gul». siste.no. Henta 11. juli 2009. «Varemerket Solo er eigd av marknadsføringsselskapet AS Solo, som er eigd av mineralvatnprodusentane Ringnes (78 prosent), Mack i Tromsø, Aass i Drammen og Oskar Sylte Mineralfabrikk i Molde.»