Oto Grigalka

Oto Grigalka
Statsborgarskap	Latvia, Sovjetunionen
Fødd	28. juni 1925 Madona
Død	8. februar 1993 (67 år) Madona
Idrett	friidrett
Tok del i	Sommar-OL 1952, Sommar-OL 1956
Utmerkingar	Hedret mester i idrett av Sovjetunionen, Ærestegnets orden

Oto Janovitsj Grigalka (28. juni 1925–8. februar 1993) var ein latvisk friidrettsutøvar som tevla for Sovjetunionen. Han deltok både i kulestøyting og diskoskasting.

Aktiv

Grigalka tok bronsemedaljen i kulestøyt ved europameisterskapen 1950. Under dei olympiske leikane 1952 i Helsinki enda han på fjerdeplass i kulestøyt og sjetteplass i diskoskast. I eit stemne på den same bana i slutten av juni 1954 sette han personleg rekord i kulestøyt med 17,20 meter. To månader seinare vann han sølv i øvinga ved EM i Bern, klart slått av storfavoritten Jíři Skobla. Under Sommar-OL 1956 vart Grigalka femtemann i diskoskast.

Grigalka var sovjetmeister i kulestøyt tre år i rad, 1952-54, og fire år i rad i diskoskast, 1953-56. Tidleg i oktober 1958 forbetra han i Kharkov den sovjetiske rekorden i diskoskasting til 56,94 meter.

Grigalka var gift med Marija Pisareva, høgdehopparen som vann OL-sølv i 1956. Han døydde i ein landsby i Madona kommune i heimlandet Latvia.

Medaljar og plasseringar i internasjonale meisterskap

• EM 1950 i Brussel: Bronsemedalje i kule – 15,14 m
• OL 1952 i Helsinki: Nr 4 i kule – 16,78 m og nr 6 i diskos – 50,71 m
• EM 1954 i Bern: Sølvmedalje i kule – 16,69 m og nr 6 i diskos – 50,60 m
• OL 1956 i Melbourne: Nr 5 i diskos – 52,37 m

Kjelder

• Denne artikkelen bygger på «Oto Grigalka» frå Wikipedia på engelsk, den 26. juli 2020.