Paul Sunde
| Paul Sunde | |
| Fødd | 5. februar 1896 Nissedal |
|---|---|
| Død | 2. september 1958 (62 år) |
| Statsborgar av | Noreg |
| Parti | Arbeidarpartiet |
| Yrke | politikar |
Paul Tjøstolsen Sunde (5. februar 1896–2. september 1958) var ein norsk arbeidar frå Nissedal som representerte Arbeidarpartiet og kjøpstadene i Telemark og Aust-Agder på Stortinget i tida 1945-53.
Sunde var son til ein småbrukar. 15 år gammal tok han arbeid ved Åmli-Treungenbanen og var så to år sysselsett med anleggsarbeid på Rjukan. I 1913 reiste han til sjøs ei tid. Fram til 1922 arbeidde han jamt på ymse anlegg. Sidan var han i 36 år kommunearbeidar i Arendal, heilt til han døydde i 1958.
Sunde var medlem 1932-34 i bystyret i Arendal og 1937–40 og 1956–58 i formannskapet i byen. Under verdskrigen sat han fengsla 1944-45 i Grini fangeleir. Hausten 1945 vart Sunde vald til stortingsrepresentant frå dei sju kjøpstadene i Telemark og Aust-Agder, attvald i 1949. Alle stortingssesjonane var han medlem i Militærkomiteen. Då ordninga med eigne valkrinsar for byane vart avvikla før stortingsvalet 1953, nådde han ikkje opp til «sikker» plass under nominasjonen i Aust-Agder fylke.